A kellu phum uh pholkhiet in um, zawnhan doh u!

Zogam Today, Editorial | 05.09.2023

Manipur gamsung buoi ni 124 (4 months 1 day) phata, venlam sangin kikaptuona hun sawt deudeu zawsop hi. Buai kipat chil apat in Media War toh kipankhawm pei hi. Manipur phaijang ah newspaper leh newschannel tamtah ua a, state pulang ah thu-le-la thethaang lam kitasam lou in ana bawl thei zing uhi. Singtanggam apat in newspaper leh news channel um ma nanleh local ham-le-pao ngen ahiman in Manipur muol-le-taangte kan joulou hi. Tuatham lou in internet kha chimit a a umna in nasatah in thu-le-la thethaangna buaisah a, singtanglamte thu-le-la Manipur pulang ah thei in um senglou hi. Buaina hing khaw deudeu a, a hun a'ng sawt deudeu chiengin ut-le-da umlou in a ning ning ah thei in hing umpan a, securityte tanpha in sil umdan leh Imphal phaijang a newspaperte nasep dan leh  thu vidante thei chien in hing um deudeu hi.

Tam banga phaijang a newspaperte thuvidan lemna leh muonna tut sanga khat-le-khat kikal a kitheisiemlouna piengsah sem a mu ahizieh in India a newspaper editor kipawlkhawmna Editor Guild of India te'n Fact Finding team hing sawl ua, tuate thumu khiette janni'n theja in um hi. Thudih leh thumaan chi'a a suokhiette un Manipur Chief Minister ban ah Editors Guild Manipur leh All Manipur Working Journalists Union (AMWJU) te'n a kellu phum tengpi uh kipholkhia pawna mama ahiman un nasatah in dem uhi. Manipur Chief Minister N Biren Singh gial in 'koite ahi uai, Northeast India thu-le-la bang tan a thei phuot uh ahia', 'anti-state, anti-national leh anti-establishment (mi nautang)' chi hial a FIR zong bulkhum a umta uh ahidan gen hi. Tuaban ah EGM leh AMWJU te'n nuolna lai a suona vuah, May 3 ni'a buoina pen Meiteite pat ahi achipen uh poi sa mama ua, ni 4 sunga tambang thutan a hei apat amu ua a bawlthei uh adiai chi'n dohna bawl uhi.

Talawmlawm, Tam bang a ki minse ta a!

Zogam Today, Editorial | 03.09.2023

Narco Terorism douna chi suonlam a I nam pumpi suh minsiet leh nuoi chimit sawm a Manipur Chief Minister leh Meitei nam pumpi in ahing minsiet sah dildel uh hawmthaw bang khop hial in niteng in khamthei toh kiman, khamthei zuo leh lei phelum pul bang in kitam deudeu mawh hi. Tam bang minsietna a'ng kikhu sah nuo in nidang sangin them khat ahing phadawm tadiai chi'a ina galdot zinglai in Lamka khopi gentalou, Shillong, Guwahati, Aizawl leh mun dang dang tanpha ah khamthei toh mat khawm in ki um zengzung nalai veve hi. Lamka khopi sunga news I et a, newspaper i sim leh khamthei toh kiman, khomipite'n thuhil in bawlkia nawnlou dingin hakhia chite nita teng phial in um jou zing nalai hi.

Mite'n poppy cultivator, khamthei a summet bawl leh gam sung susia chia ngoh thei ngohmaw a hing ngoh ban vuah, gam pam lamtan a suh minsiet thei tan chieng a a'ng suhminsiet uh hun sa nailou khat hou I hi lon di duai chi uthuai phial hi. Coordinating Committee on Manipur Integrity (COCOMI) spokesperson Khuraijan Athouba in hou, ITLF kichi khu immigrant Chin-Kuki narco-terrorist organizations lamkaite ahi ua, mawhna neilou Kuki-Zo nautangte chilsia in gal piangsah uhi chi'n ngohna bawl a, India solkal kungah ITLF toh kihouna a nei uleh Manipur mipite'n pom theilou ding chi'n giihna bawl hial uhi. Kuki-Zo nampi khu Poppy Cultivator ahi chi'n PIL ana seplut hial ua, hinanleh Supreme Court in nam pumpi khat Poppy loubawl chia ngohna pen sil dihlou ahi chin ana nual hi. Police Officer lui Thounaojam Bindra in Karan Thapar toh 45 minutes akihouna uah, Chief Minister N. Biren Singh in War on Drugs campaign chia a tangkoupi pen ama a doutu hilou in a lamkai lubawh pen ahi chihial ma nanleh tampa khu Kuki-Zo mipite tunga minsietna tuntu leh a lamkaipa ana hi khinkhian dan ahi.

Tulaitah a Kuki-Zo te'n i poimaw uh!

Zogam Today, Editorial | 02.09.2023

Tulaitah in Kuki-Zo te'n i poimaw pen uh bang ahiai chi'n kidong talei, khen khat in lemna-le-muonna, khen khat in thauvui-thautang, khen khat in ne-le-ta, khen khat in kituana leh pankhawmna i chi meithei. Tulaitah in i poimaw uh tam chitah in tam a, gial suhsuh ding hitalei tawp theilou phial a gel ngai meithei ding hi.

Manipur gamsung buoi akipat chillai apat in en vengveng lei nasatah a i basapna u khat um zing hi. Tuami ahileh I dihna leh ei hing kibawl dante, dihlou tah a ngoh a i umdante uh, ui bang a ang ki soisah dante talatna ding, gampam lang toh kithuza na ding leh siltungte mite'n ana mutheina ding ua poimaw mama News Channel ana kinei lou hi. Local news leh eima ham a i thezate uh i sanggam ngel uh Mizo te nasan in sim theilou leh a thua i gente uh thei chienlou chilei i genkhiel sih ding hi. I big brother Mizo'te na ngon in a thei lou uleh India tuolpi a kol-le-vaite'n a ha thei lou lou didan gen a gen guollou ahi.

Valley district a Cable Service Provider lian tahtah - ISTV, Impact TV, TOM Tv leh a tangdang te'n English New bawl chiet ua, tuami in khovel pulang tan ah nasatah in thu-le-la theza hi. Eilawi thu-le-la a'ng kitheza na ahileh Modi in numei bawlsietna tungtawn a kam teng khat teng ni ang gendoh ni apat Mainland India Mediate'n hing theipha man vanieng uhi.

Gaalte gaal I lawm, amau awl in bawl nai - Pramot

 Zogam Today, Editorial | 01.09.2023

Manipur namkal buoina matawng a pang Meitei Leepun lamkai Pramot Singh kam teng nua et kia cheuh lei ut huai isa. A thugente himhim Meitei hilou a singtangmi khat kamteng hileh akinlam a suongkul baang zut ahita ding hi. Hinanleh tunitan in Biren Singh guolzawlna nuai ah a ut a thei in khuong nalai a, singtang mite tha chimitna ding guonggaltu in pang zing nalai hi. Tampa tunga India solkal in akhelna bang a vaihawmna kituoh a pia lou ua ahileh vang India vaihawma zong gingtat huoi jou nawnlou khop ding in gingtat huai hi. Kuki Students Organisation (KSO), Sadar Hills te'n June 13 ni'n hehna lai ana pelut ua, hinanleh July 8 ni'n Kangpokpi district Police station ah FIR giallut pan ua, Indian Penal Code section 120B, 153A, 504, 505, 506 leh 34 tungtawn a case bulkhum in um a, hinanleh tunitan in a tungah bangma bawl hinailou hi.

Tampa thugen khenkhat, April 28, 2023 ni'a a facebook status ah, baakhat sunga dingin 'ka galte gaal khu ka lawm ahi, hinanleh amaute awl in i khoina ding hi' (For the time being let's go with "Enemy of my enemy is my friend" and let's deal with them later). Tampa thugen umzia ahileh hun tomkhat a dingin Kukite kal hizing Nagate kilawm pawlpi phot vai in, awl in Nagate zong etkai ahi ding achina hileltah hi. Naga mipite'n theisiem ta meijen uleh tampa thugen apat singtang miteng target a koi ahidan kichieng kengkung hi. ATSUM in singtang miteng ai-awh a lampi juina ana nei ua, buoina hing kipat phet a Kukite tunga hing tuom hasiem vilvel ahidan uh hoitah in ngaisun vingveng lei, tampa thugenpen hoideu a kithuhil masatna um ahi chipen chieng mama hi.

Pawl pung deudeu, thu-le-la tam deudeu

 Zogam Today, Editorial | 31.08.2023

Manipur a tuolgal kipat May 3, 2023 ni apat Lamka khopi sungah kipawl khawmna chi tuomtuom hing piengkhia a, tuni chiengin khut zung hia thei khop phial in pung deudeu nalai hi. Kipawlkhawmna tam laisia iki tanauna leh i pankhawmna hatsem ding adiai ahisihleh bang tupna toh pawl tuomtuom bawlkhiet a um chipen bildaw huai mama khat ahi. Sil khat bang khat patkhiet a a um thei leh na hoi sem dinga hing kipa nuom ahi chi'n koi phot talei...

Theipha tan in May 3 nuo apat kiphawlkhawmna pawl siemkhiet a ana umte i theidan in ITLF Steering Committee, Zomi Council Steering Committee, Committee on Separate Administration Manipur, Joint Student Body ban ah tu nai mama a hing gingkhia Join Inpi' Council chite ahi. 

Tam pawlpite tup-le-ngiim ahileh Kuki-Zo leh Meitei buoina ziah a siemkhiet khen khat um a, hun saupi dai ding a siemkhiet zong um veve hi. Buai kipat chil apat lam chinteng a hing kaihuai leh maphutu ahileh ITLF ana hi zing a, tuazaw in gam-le-leitang kivaihawmna lam gen-le-sah hing ngaita chi ahiman in ITLF Steering Committee hing piengkhie hi. Tuazaw in tup-le-ngim kibang hi thou khat Zomi Council Steering Committee chi hing piangkia a mipi lungmawl tampi buai ahidan kihoulimna tampi apat ja leh muthei in um hi. Nautang houlimna ahileh ITLF Steering Committee um jen napi bang ziah a SC Steering Committee dingkhiet a um kia sese chi dohna tampi um hi. CDSU a ana kipawl zing, hung sawtpi common forum a ana um khawm nawnlou sangnaupang pawlpi tuomtuom te'n Joint Student Body chi'n kipawlna hing bawl kia ua, hattah leh hangtah in sangnaupang vai toh kisai, Frontline leh a poimawna mun chin a matawngtu in pang ua, phattuomna tampi um a mu ahi.