Pawl pung deudeu, thu-le-la tam deudeu

 Zogam Today, Editorial | 31.08.2023

Manipur a tuolgal kipat May 3, 2023 ni apat Lamka khopi sungah kipawl khawmna chi tuomtuom hing piengkhia a, tuni chiengin khut zung hia thei khop phial in pung deudeu nalai hi. Kipawlkhawmna tam laisia iki tanauna leh i pankhawmna hatsem ding adiai ahisihleh bang tupna toh pawl tuomtuom bawlkhiet a um chipen bildaw huai mama khat ahi. Sil khat bang khat patkhiet a a um thei leh na hoi sem dinga hing kipa nuom ahi chi'n koi phot talei...

Theipha tan in May 3 nuo apat kiphawlkhawmna pawl siemkhiet a ana umte i theidan in ITLF Steering Committee, Zomi Council Steering Committee, Committee on Separate Administration Manipur, Joint Student Body ban ah tu nai mama a hing gingkhia Join Inpi' Council chite ahi. 

Tam pawlpite tup-le-ngiim ahileh Kuki-Zo leh Meitei buoina ziah a siemkhiet khen khat um a, hun saupi dai ding a siemkhiet zong um veve hi. Buai kipat chil apat lam chinteng a hing kaihuai leh maphutu ahileh ITLF ana hi zing a, tuazaw in gam-le-leitang kivaihawmna lam gen-le-sah hing ngaita chi ahiman in ITLF Steering Committee hing piengkhie hi. Tuazaw in tup-le-ngim kibang hi thou khat Zomi Council Steering Committee chi hing piangkia a mipi lungmawl tampi buai ahidan kihoulimna tampi apat ja leh muthei in um hi. Nautang houlimna ahileh ITLF Steering Committee um jen napi bang ziah a SC Steering Committee dingkhiet a um kia sese chi dohna tampi um hi. CDSU a ana kipawl zing, hung sawtpi common forum a ana um khawm nawnlou sangnaupang pawlpi tuomtuom te'n Joint Student Body chi'n kipawlna hing bawl kia ua, hattah leh hangtah in sangnaupang vai toh kisai, Frontline leh a poimawna mun chin a matawngtu in pang ua, phattuomna tampi um a mu ahi.

A naipen a gen in Kuki-Zo sunga kipawl khawmna Inpite'n 21st August 2023 ni'n Mizo People's Convention: Manipur zumpi Hmuia veng ah Joint Inpi' Council (JIC) chia kiminvaw in Hmar Inpui (HI), Kuki Inpi Manipur (KIM), Mizo People's Convention: Manipur (MPC:M) leh Zomi Council (ZC) pang uhi. 

Council siemkhietna ziah a genna vuah point 7 kiteltah in talang uhi. Tam pointe ahileh:

1. Council ahileh Inpi teng kikhaikhawmna Inpi ahi ding.
2. Council in nasep silbawl tuomtuom tungtawn a kimuontuana leh pankhawmna umsah ding.
3. Council in Inpi memberte khat leh khat chituom vilvelnate ki zatat sah tua a chiel a um ahilou ngal uleh khat vaihawmna adangte ki tahla lou ding.
4. Council in nautang leh gam vaihawmna toh kisai a tup-le-ngim kibatna munte a nasep khawm ding.
5. Council in amau chiet member tribe te hoita ki-etkol chiet a kitanauna leh kitheisiem tah a vaihawmna pien sah chiet ding ban ah pawl dangdang toh ki theisiem pum a masuon khawm ding.
6. Council in tup-le-ngim kibang a nasepna te etkai leh pawltuomtuom te toh kithuza ding a tup kibang a nasep a umte pampial le sahlou ham ding leh
7. Council theipina lou a member Inpite'n pawl min ut bang a zah lou ding chite ahi.

JIC in Aug 30 nia press clarification a bawlna ah, tami JIC in kitanauna leh kichimatna hatsah sem ding a deipen ahiban ah tu-le-tu a Manipur buoina a kitahla lou ding leh tuabang political agenda te genkha a nei nailou ahidan uh mipi lungbuoite a ding in suhsieng na nei uhi.

Tami JIC te Statement of Purpose te i sim leh sil hoi lam ngen tupna vang ahi, hinanleh point 3 na in agen pen critical deu in entalei, 'the council shall respect the distinctiveness ...' china pen in unao khat, laigui zom leh tuun sung khat pan piang hi ngeingei hang e i chi jel pen hisah nawnlou hing bang simta hi. Aban ah entou nalai lei, khat kivaihawmna a dangte va kitahla lou ding chi pen sil hoi mama ahi.

Inpi khat in thagum, thau tang thauvui toh Innpi a telkha lou tribe khat a gawt bawlta a ahileh JIC in bangtan a maw paw ding chite genkha hilou hi. Tua ahiman in tunia kigen Inpi 4 teng, khat penpen a beh teitei ding china hileh hing kilawm dohta hi.

Unao laiguizom, ki it ding, pangkhawm ding chia tang koukou ikisah lai in aki giingtua chiet, a ki jaattua chia leh akimuda tua chiet hilei hing kilawm dohta hi. 

Maban ah bang lam toh kisai enkaitu dingin bang pawlpi ang piangkhe kia diai chipen mipite bildaw khat ahita hi.