Zogam Today, Editorial | 05.09.2023
Manipur gamsung buoi ni 124 (4 months 1 day) phata, venlam sangin kikaptuona hun sawt deudeu zawsop hi. Buai kipat chil apat in Media War toh kipankhawm pei hi. Manipur phaijang ah newspaper leh newschannel tamtah ua a, state pulang ah thu-le-la thethaang lam kitasam lou in ana bawl thei zing uhi. Singtanggam apat in newspaper leh news channel um ma nanleh local ham-le-pao ngen ahiman in Manipur muol-le-taangte kan joulou hi. Tuatham lou in internet kha chimit a a umna in nasatah in thu-le-la thethaangna buaisah a, singtanglamte thu-le-la Manipur pulang ah thei in um senglou hi. Buaina hing khaw deudeu a, a hun a'ng sawt deudeu chiengin ut-le-da umlou in a ning ning ah thei in hing umpan a, securityte tanpha in sil umdan leh Imphal phaijang a newspaperte nasep dan leh thu vidante thei chien in hing um deudeu hi.
Tam banga phaijang a newspaperte thuvidan lemna leh muonna tut sanga khat-le-khat kikal a kitheisiemlouna piengsah sem a mu ahizieh in India a newspaper editor kipawlkhawmna Editor Guild of India te'n Fact Finding team hing sawl ua, tuate thumu khiette janni'n theja in um hi. Thudih leh thumaan chi'a a suokhiette un Manipur Chief Minister ban ah Editors Guild Manipur leh All Manipur Working Journalists Union (AMWJU) te'n a kellu phum tengpi uh kipholkhia pawna mama ahiman un nasatah in dem uhi. Manipur Chief Minister N Biren Singh gial in 'koite ahi uai, Northeast India thu-le-la bang tan a thei phuot uh ahia', 'anti-state, anti-national leh anti-establishment (mi nautang)' chi hial a FIR zong bulkhum a umta uh ahidan gen hi. Tuaban ah EGM leh AMWJU te'n nuolna lai a suona vuah, May 3 ni'a buoina pen Meiteite pat ahi achipen uh poi sa mama ua, ni 4 sunga tambang thutan a hei apat amu ua a bawlthei uh adiai chi'n dohna bawl uhi.
Manipur a Meitei intellectual tawsotna toh solkal kithuo a systematic deu a singtangmite tunga nasep a banban a umte EGI in phoulang ditdet ahiman in ahina tah uh ki gen chieng vaguap leh vaset in a hinna uh khoikha mama ding ahi ding, pom theilou ua, pom zong pom utlou ding uhi. Media lang a hat leh bawl thei mama ahi dungjui un, a bawl theina chinteng uh suo in EGIte thu mukhiette suhmitna dingin bang bang a'ng bawl tou uai bildaw huai mama khat ahi.
Tam EGIte thu suo ahileh Meiteite a ding in mit a malta tui luonglut kha bang ding hi. Singtangmite a di'n India gam sunga i dihna leh mawhna neilou, del mang a i um sawmna uh mite thei a thethang na bul hing hi bep nalai ding hi. Maban a Meitei solkal in ang bawl dingua gingtat ahileh mainland India apat journalist kichi tapou hoideu a screening leh monitor in hing um ngeingei ding uh chipen muthei in um hi.
Bang chi hunlai pou in Media role poimaw hi, hinanleh gal um hun chiengin lemna leh muonna umna dingin zong mawpuohna lienpi nei hi. Thudih leh thutah dinpi ngam ngai a, lemna leh muonna um theina din thusuo thugel in nasapin mawpaw pha hi. Phaijang news reporter leh a thugelte uh i sim kha chiengin lungthahna ding tampi um a, a nesep hoilou uh, a kellu phum un hing dawh panpan ahita hi.
No comments:
Post a Comment