Zogam Today, Editorial | 06.09.2023
Tedim road tungtawn, Imphal apat Lamka district tan a Central Armed security check post leh a umna munteng uh phietmang ding in Coordinating Committee on Manipur Integrity (COCOMI) in nasatah a kisingsahna nei ahidan uhi. COCOMI Media Coordinator Somorendro Thokchom in Lamphel office a agenna ah August bei masanga Army barricade teng ladoh di'a thuneitute kunga theisahna ana bawl ahi dan uh gen a, hinanleh nahsah lou a a um zia ua thagum toh ladoh ding sawm uh ahidan hi gen. COCOMI Women Wing in zong Manipur nuteng chielna bawl a, September 6, 11AM chia Torbung Bangla a tungkim chiet dingin chielna bawl uhi.
COCOMI Women Wing in bang ziah a Torbung Bangla a chi khel khel, bang ziah a a gam tawpna uh Phougakchao Ikhai tan chilou? Tami a siltup un gen-le-sah tampi nei hi. Tedim road zui a Meitei gam Bishnupur district tawpna khu Phougakchao Ikhai hita lellou amah? Imphal apat Lamka lang i nawt leh Phougakchao Ikhai ban ah Kangvai, S. Kawtlian chite um a, tuaban ah Torbung hing hipan hi. A gam sungua na asep nuom ua ahileh Phougakchao Ikhai tan ah a ut ut uh bawl lel uleh himeilou amah? Bang ziah a tambang gamsung buoilai tah a Torbung Bangla a kisutua di achi khelkhel uh amah? COCOMI in sil guon a tawpsan lou ua ahileh Manipur khangthu a bei ngei nawnlou ding mawhna neilou nautang sisan tui bang luong thei ahiman in, a mawhpuohna a la jou na ding vuai? COCOMI in a vaiguon a ettha ngai a, India dan-le-dun enkai tute nasepna pen zatat leh panpi poimaw zaw hi. Hinanleh tutung a COCOMI te nasepdan leh a vaiguon uh et in lemna leh muonna dei hilou ua, namkal buoina sousah sem sawm ahi uh chi kilang hi.
State leh Central solkal in lemna leh muonna umna ding chi'a lamthuom a security a koite un abang uh sukha ahia? Kuki-Zo khote a ka chimit sawmna uh nawngkaisah amah? State security force te zalen tah a azah theilou zia uh amah? Ahisihleh solkal galvan aladohte uh zalentah a azah theilou zia uh amah?
India solkal in lemna leh muonna a deitahtah a ahileh tamna buoina tohthou dinga ki singsa COCOMI leh a numei pawlte vaiguon a pichin suolou ngai ahi. Bangma bawl ngamlou a, a ut a thei ua a gamtat sah ua, Torbung Banla tan a ki zawt sah ua ahileh Manipur khangthu a di'a gen mangmaw thusim ngainuom huoilou pen piang dingin gingtat huai hi.
Kuki-Zo te'n Kangvai tan ka gam uh chi'a akinisah lai ua, Meiteite'n Kuki-Zo gam sung Kangvai khel a a'ng gamtat sawm pen uh Kuki-Zo suonte dinga ki simmawhna lianpen leh kimusitna lianpen banga ngai ding ahiman un, shi zong khaw salou a gam vengbit ngap ding ua gingtat ahi, Tua ahiman in tamna COCOMI leh a numeipawlte uh vaiguon akisaipi lamkai te'n a kin lam a etkai poimaw hi.
No comments:
Post a Comment