Zogam Today, Editorial | 07.09.2023
Union Home Minister Shri Amit Shah guolzawlna nuai a gamtang, Manipur a communal Chief Minister chi'a minvuo a um Nongthombam Biren Singh lamkaina nuoi a BJP state solkal dan-le-thupiate (orders) mi nautang in a juilou dan leh a giinglou dan et in Manipur state solkal pen a umlou bangmai ahita hi. CM Biren Singh leh akai zatamte phingphing phangphang chi'n au in, mipi deina banga vaihawm dan in kigen ma nan uleh mipi'n thulah a nei nawnlou ahidan kichian deudeu hi. District Megistrate te'n 144 CrPC khautah a jui dingin thusuo bawl vahuau nan uleh tulaitah in koima'n jui ding leh jatat dingin zong gel nawnlou hi. Tami in a etsah ahileh Manipur a dan-le-thupia kise dildel ahidan chieng mama hi.
State khat a di'a a lianpen Chief Minister in a gam sunga thuneina neijou nawnlou chipen khovel a zumhuai pen leh minsiet huaipen ahi, Hinanleh zumna latheilou leh mipi'n a dei nawnlou CM ahi chi kithei giagua napi a a siemmawhna pom theilou CM neikha Manipur mipite lungsiet huai kihi mei hi.
Former Army Chief Ved Prakash Malik in Manipur a Dan leh thupiah (law & order) dinmun in thuneina sangpen te apat akinlam a ngaisah poimaw ahidan ana gen ngeita hi. Twitter a post a bawlna ah, kei kahi leh Manipur a teng mi nautang khat kahi, Manipur khu vaihawmna bei bang ahita. Libya, Lebanon, Nigeria, Syria, etc. gamte banga mi khat a a ut hun hun chia suhsiet thei chinteng susia a, mihing hinna alah thei na mun uh ahita... ana chi hial hi.
Tu dinmun in Manipur gam sungah State Solkal vaihawmna singtang gamte ah a umlou toh kibangta a, tuathamlou in phaijang district sung khen khat azong Biren vaihawmna pen pom nuomlou leh a deilou tampi umta hi. Hinanleh thagum thatang a a inn uh kihal ding jauman a kam keh ngam tamlou hi. Mipi deilou leh buoina suhveng sawmlou Chief Minister hinanleh buoi kipat chil apat tunitan sil umdan et in Central solkal in Biren heng khelou ding ahi uh chipen kichian mama ta hi. Sil dang dang a anasep dan minsietna ding tampi um himananleh Biren in BJP political party interest toh kisai hoitah a enkai pha nalai hidan a central solkal in mu hizawsop ahiman in tampa pen bangchi'n gen suh gentou nanlei heng hilou ding ahidan kichian mama hi.
Manipur CM Biren henkhiet hilou ahiman in Central solkal a thuneitu PM leh HM te'n Biren gengen pen a dih a apom phot uh ahita mei, aziah a lunggel deilou uh hitaleh hengkhe ta mama ding uhi. Sil udante et in Central solkal in Meitei communityte side ahi uh chilei kichi chial mama lou ding ahi. Aziah ahileh, tam bang teng sil tungta a ki lakhe nailou chipen a chetna kichian pen ahita hi.
Tua ahiman in Amit Shah in sil khat bang khat a'ng gen chia kimu dehdehhta, kimu ding mama hita chia mipite sol chavai pen habawl lou hoi kha ding hi. Tam bang dinmun a ding ihiman un, pawl tuomtuom a ki ningbawl, sinei langnei chite a pum a pum paikhiet a, kihou dial dial leh kikum dialdial a nasep khawm ipoimaw pen uh ahita hi. I dinmun unlah hoilam nawt nailou phot ahichia pankhawm leh kidohtuo dial dial leh alampi um sun khat ahi.
No comments:
Post a Comment