Zogam Today, Editorial | 02.09.2023
Tulaitah in Kuki-Zo te'n i poimaw pen uh bang ahiai chi'n kidong talei, khen khat in lemna-le-muonna, khen khat in thauvui-thautang, khen khat in ne-le-ta, khen khat in kituana leh pankhawmna i chi meithei. Tulaitah in i poimaw uh tam chitah in tam a, gial suhsuh ding hitalei tawp theilou phial a gel ngai meithei ding hi.
Manipur gamsung buoi akipat chillai apat in en vengveng lei nasatah a i basapna u khat um zing hi. Tuami ahileh I dihna leh ei hing kibawl dante, dihlou tah a ngoh a i umdante uh, ui bang a ang ki soisah dante talatna ding, gampam lang toh kithuza na ding leh siltungte mite'n ana mutheina ding ua poimaw mama News Channel ana kinei lou hi. Local news leh eima ham a i thezate uh i sanggam ngel uh Mizo te nasan in sim theilou leh a thua i gente uh thei chienlou chilei i genkhiel sih ding hi. I big brother Mizo'te na ngon in a thei lou uleh India tuolpi a kol-le-vaite'n a ha thei lou lou didan gen a gen guollou ahi.
Valley district a Cable Service Provider lian tahtah - ISTV, Impact TV, TOM Tv leh a tangdang te'n English New bawl chiet ua, tuami in khovel pulang tan ah nasatah in thu-le-la theza hi. Eilawi thu-le-la a'ng kitheza na ahileh Modi in numei bawlsietna tungtawn a kam teng khat teng ni ang gendoh ni apat Mainland India Mediate'n hing theipha man vanieng uhi.
Tua ahiman in Lamka, Kangpokpi leh Moreh a Cable Service bawlte'n zong ahithei liai leh English News zong pat hingsawm ta uleh deihuai mama hi. English news channel i nei sih ua ahileh ana neite thugen teng gal apat ana zate'n ei mawhna ngen in ana koithei uhi. Tuni'a information dih leh dihlou theithang poimaw a, ana ngaisawnte thudih theisah poimaw hi. Electronics tungtawn in khovel zong neu hiai hiai ta a, Kuki-Zo mipite meimei in i thei uleh hunza chi hun hinawnlou hi. India mi-le-sa ihiman un Kol-le-vaite'n zong thudu tah in bil ana daw zing ua, India solkal adia zong information ngahna poimaw tah hing suo ding hi.
Lamka cable service ten i pan thei ta ding uai le?
No comments:
Post a Comment