Pastorpi Niangzadim 75th Birthday Thanksgiving

PI NIENGZADIM TANCHIN TOMKIM

Pi Niangzadim ahileh Pu Khuphau leh Pi Vungzadim’te tanu tum pen ahi. Kum 1944 in Lungshai khuo ah ana piang a, pianpi sanggam pasal 4 leh numei 1 anei hi. Amaute ahileh;

1. (L) Pu Tutgoulam h/o (L) Pi Chiinkhodon

2. (L) Pu Tutgoulian (Rev. Goulian) h/o (L) Pi Vungkhoching

3. (L) Nu Niangkhochiin w/o (L) Upa T. Chinzakhai

4. Pu Tuangin h/o Pi Chiinkhodim

5. (L) Pu Dongzakap h/o Pi Dongniang

6. Nu Niangzadim w/o (L) Rev. T. Kamzakhup

A Neulai Tanchin

Lungshai khuo a ana piang a, nausen ahilai in Phulpi khuo, Vangaitang lam ah ana pem ua tuanah kum 4 vel ana teng uhi. Tuazaw in phaijang lam nehsuina ding suina in Damveng kichi tu a Khuongnung leh Tuikham kikal ah kum 1 vel ana teng ua, tuazaw in Daijang kholui (tu a Tuikham khuo hanmual gei) ah 1949 in ana teng lut kiata uhi. Pi Niengzadim pienna pa ahileh Pupa tawndan a Siempu hinanleh tuahunlai in Pasian thu ana theita Tuikham khuo ah ana kikhawm jel ua, hinanleh mi nuai a kikhopkhop sang in chi in kikhopna di Hattuom bupang/anbu susieng tu vel in ana pang theita hi. Tuahunlai in Evangelist Thongluon etkolna nuoi ah ana um uhi. Tuahunlai in Pasian thu ana ja in, ana thei nan uleh a pianna pa Pu Khuphau khu siempu ahiman in kithoina chite bang ana bawl jeljel ua, kithoina sate bang ana ne mun mama hidan uhi.

Laisimna Lam

Daijang kholui atenglai un Tuikham Govt School ah lai ana sim a, tua hun lai Nengkhogin leh Huotzalien te sangsie in ana pang uhi. Tuana school ah Meitei ham in lai ana zil ua, ANI Subah tan ana sim hi. Tua hunlaia a lawm-le-guolte skul kai umlou ahiman un, laisiem theitah hinanleh ama zong skul kai sanga lawm-le-guolte bang a lawi-le-bawng ching vel ana thanuom zaw ahiman in skul kai ana sunzawm tasih hi. Tunitan in angka a khuot chiengin ama ani ahum chidante toh tuotzing nalai hi.

Pasal neidan

Nungah khangdawng ahilai apat in phamsa Rev. Kamzakhup in Pasian gam nna seppi ding in ana lunggul zing hi. Ama nu naupang tah hinanleh pastorapu’n ana zawlzawlta ahiman in amanu’n zong Pasian gam nasep khawmpi dingin ana phasahpi tahi. Pi Niangzadim zong Pasian thu ana lunglut ahiman in Pasal ding pen Pasian lam a kipe mi ma achi zieh in a neu lawmngai zong ana taan hial in Pastorpu toh Feb. 15, 1959 in Pasian Dansiengthou in Pastor Khamzalian khut ah kitenna thuchiem ana neita uhi. A tehpinu ana dam nawnlou ahiman in Pastorpu toh akiten uapat a pasal pienpite unao naupang hon enkol leh a tehpu enkoltu in anapang pei a, naupang tah hinanleh lungpi chingtah mei in aneu alien lungtaina bangin innsung nu mawpuohna ana jou tou peh hi. Gil-a-gaa goutan ta 7 aneizaw un a it a angkawi Pastorpu’n May 3, 1979 in ana sisan ta hi.

Pastorpu toh gil-a-ga goutan ta Pasal 2 leh numei 5 uhi.

• 1.     Niangkhanman w/o B. Chinzalam  - Born 1960
• 2.     (L) Dimneichiin    - Born 1963 (ni 8 dam)
• 3.     Dimneikim w/o M. Zamkhogin  - Born 1964
• 4.     (L) Khamzahau    - Born 1968
• 5.     Vungsuanching w/o Ginkholien  - Born 1970
• 6.     Lamneichiin w/o William Francis - Born 1972
• 7.     T. Zamlunmang h/o Irene Tungnung  - Born 1977
• 8.     Haumuanching w/o Mangminlun Suantah - Born 1978 (Tunu)

 Gil-a-ga goutan ta numeite apat Tu 18 mel muta hi.

Meithai Hinkhuo

Pi Niangzadim in a meithai hinkhuo agen ama kamteng ma in sim vai awle – “Ka it, ka pasal in ahing beisan nua hinkhuo ahileh hamsa chilou ngal genbe ding um senglou hi. Ka tate lah innsung a setthei leh kingahna thei um nailou, nungah nou leh mawl thitthet a hinkho zang ngen ahinalai man un, Nu-le-Pa dinmun tu pum in hinkhuo kana zang hi. Innsung I etna lamlam hawm hiaihuai mei, ka pasal touna, lupna lah hawmta, I lungkhamna khat ki kuppi ding chilei lah um talou, hitui-naptui toh hinkho zah  hun tam mama hi. Ka kingahna thei sun chi’n Pasian lam nga vevaw in hinkhuo kana zang jel hi.

Ne-le-ta dinmun lah gen a gendan um lou, antang tiin lah dim kingkeng chi umthei talou, khat a um leh khat ana bei, genthei hinkhuo vang buonnawi pal in kana pal dildel hi. Meithai hinkhuo kichi a dengdel dan dan, bang e khat bawllei la hing na gense di ki tasam lou. Naupangte sangin kaina puonsil-niihten hoilah kiguon joulou, toka tawke leh kengkoh kise nieunuau toh sangin kai a akuon u ka etchieng in a nualam uapat ka mittui toh ka kitehni atam zaw ahi zing hi.”

Pasian gam nna a thei khamkham a nasepnate:

Kum 1984 kum in Zomi Women Christian Association (ZWCA), Ghq ah Chairperson in ana pang a, 1990 apat 2003 sung teng Lamka District MWCA ah Chairperson ana hi tawn tung hi. Tuachi’n a bawlthei umsun chi’n Chairel Mission field a Biehinn a din masang sie in Anngol in ana thum a, Biehinn ahing din khieh tan Mangpa mai ah a thuchiem ana sem suo hi. 

Shillong Lutheran Church: 

Mangpa’n ama puijel in a gentheina apat in atate jal in tenna ding a khopi nop mama Shillong mun-te bang va um thei hi. 9th May 2008 ni’a Meghalaya khopi Shillong a Lutheran hattuom phuna ding in Committee han ding ana chi lai un meeting na ding a inn phal ngam koima ana um sih uhi. Koima a uplou lai in a tanu Lamneichin leh apasal William Das Francis te kungah ana gen a, tuachi’n ka u te’n kiphal tah in a inn uh meeting neina ding in ana phal uh ahiman in tuani’n Shillong Lutheran Church phukhiet ding in thutanna ana bawl ua, bulpi lamte’n ahonna ava nei ding ni uh tanpha bikhietna ana bawl uhi.

Pi Niangzadim in a gendan “tua hunlai tah in member peikhawmte tawm kisa seng seng in apatau ua, ken tua hun laitah in Job 5.6 ‘Na kipatna neu nanleh na ni nukhia lam ah na hing thupi deu deu ding hi’ achi thu leh Esther 6:10 na pansan in hanthawnna thu kana gen a, Pasian nasep theina hing kilang pei in, ahing subuoi diing a hingpeite member in ahingpang thei mawh ua, adou diing a hing kuonte guolzawlna thumna nei in ahingpang thei uhi” chi’n gen. 

Delhi Lutheran Church: 

Pi Niangzadim kammal ma in sim suh kia vai le “tam SLC hattuom kiphu zaw in kei pen Delhi lam a, Pasian guolzawlna tang Delhi a nasem ka tapa Zamlunmang leh ka tunu Naomi Haumuanching te kunga um ding in kapeita hi. Delhi a ka umlai tah in MELC-Delhi kiphu kum toh a’ng kituoh kia a, keima ngel zong theitawp suo in hattuom naupang mama ahina dinmun ah tahsa lam ah hat zou nawnlou hinanleng nu-le-pa dinmun kana puo a, Pastor Kamsuanlal @ Lalpu – kingahna (zintun leh paikhaina) in kana pang thei jel hi. Tuahunlai a founder Chairman ka tapa tum Zamlunmang ngel zong a thase pumpum a pang hinanleh hasotna thu ka genpi jel a, Pasian gam leh amipite puihuai ding a deitel na hi theilaisien thaphang lou in pang in chi’n ka hantawh zing hi. Tamte kangaituo ngetngut chieng in kei pen Mangpa’n angdei sih kachi thei sih hi.”

“Delhi mun ah, nam tuomtuom akipat nute’n thumkhawmna aki nei a, tami ahi leh Munirka Force ka chi uhi. Tuate lah a sepkiani teng in thumkhawmna kanei jel ua kei zong igam leh I hattuom a ding in kana thum zing hi. Tualeh, keima’n kabawl theipen chi’n 2011 kum in Lamka khopi sungah Pasian phatna lasa in hattuom tuomtuom ah kava kikhawm kawikawi a Mangpa phatna la sa in hattuom khen lou in ka thahatna in ajaw laitan in kana vah viel viel hi. Mangpa min phat in umhen. Pasian in a’ng pia thahatna leh aw ka nei laisie Pasian min phat khu ka leiba ahita hi”.

Lamka khopi leh a kimvel a thumna tatlou a nei zing pawl 'Nineveh Revival' leh 'Haleluiyah Prayer Band' ah adam liai na pouleh tatlou a pang zing jou zing Pasian phatna la sa tawn tung zou zing, nu ettonta khat ahi.

PASIAN IN THUPINA TANG TA HEN