Khovel thuthang tuomtuom i sim leh a gam gam ah dan leh thupia (Law and Order) chi tuomtuom, a khau sem leh mimal privacy tanpha phuolsel theilouna ding khop a kingahna hing um panpan ta hi.
America na haw nuom leh lai poimaw chi tuomtuom ban ah na social media username, kum nga peisa a mobile number, email address nazah ban ah, na khulzinna teng zong a chieng deu a na piah ngai, tuaban ah na innkuon sung apat helpawl toh ki zopmatkha chivel a um lezong USA lut thei nawnlou na ding khop a Dan leh Thupiah khausah in umta hi.
Indian Danbupi (constitution) Article 19(1)(a) in India miteng kungah Freedom of Speech and Expression tanvou penanleh India ah a tanvou zang a kinei mi tampi Indian Penal Code Section 124 tungtawn in mat leh jail tanpha lut umta hi. Indian Penal Code Section 124 in, a thu chieng semna dingin English in gen lei, "Whoever, by words, either spoken or written, or by signs, or by visible representation, or otherwise, brings or attempts to bring into hatred or contempt, or excites or attempts to excite disaffection towards the Government established by law in India shall be punished with imprisonment for life."
Section 153A in Nam-le-Nam kal a kisiet kibal theina ding kamsuo phallou, Section 295A leh Section 298 in sakhuo toh kisai thusia lasie piengsah theite phallou. India ah Freedom of Speech and Expression tanvou nei nanlei, tuami tanvou a kheng a val a zah ziah a midang leh nam dang a di'a hoilou ahileh Dan leh Thupia dang toh ngadet in ki um tham hi. Mi nautang in i lungkhawmna, i deileh ngai solkal in ang ngaisah ding deina toh khutzah a i nei manphat mama ukhat Bandh toh kisai in Kerala High Court in Bharat Kumar case, 1997 tungtawn in Bandh legislation ana bawl ua, bandh khu illegal chi'n ana puong uhi. Tuami tungtawn in Manipur solkal in May 30, 2017 ni'n Manipur a zong Bandh Legislation bawl ding chi'n ana kikum ngeita uhi. Hun hing pei jel dinga, legislation chu tuomtuom hing pieng nalai ding a, mani mimal privacy tanpha phuolsel theilou hun zong hing um mama ding ahidan gingtatna lianpi nei kahi.
Dan leh Thupia Khausem Umdia Ka muonmawte:
Tam bang Dan leh Thupia kining ching tah nei hinanlei, khovel sil umdan leh India sung a thu-le-la gindan tungtawn in law and order pen a khau sem hing piang nalai ding ban ah mani mimal privacy gentalou, nang khelna ziah a na innsung mite tanpha tanvou (rights) zong zah theilouna ding dan-le-thupia hing piang nalai tham dingin gingtat huai kasa hi.
Digital India pen nasa sem in hing kibawl nalai dinga, solkal program tuomtuom tungtawn in nang ma leh na innkuon teng tanchin a chiengkuong theitawp digitalize a hing ni hun hing um mama ding hi. Tuahun chia pen na min a ki type leh nang ma mimal detail hinawnlou, na innsung mite tanpha detail teng datdatdat chi'a hing kilang lel didan ahita hi.
Bandh a pang theilou hun, protest a pang phallou hun, solkal kal lampang a kamke theilou hun hing um ding in gingtat huai a, tuamite a i kihal leh Police in case hing bawl khum taleh i innkuon data teng bailam tah a thei hipai ding in gingtatna lianpi ka nei. Tuahun chia Dan leh Thupia hing pieng thei nalai ding khen khat, eima khelna or dankal a gamtatna ziah in eima mimal meimei hitalou, i innkuon member teng tunga zong legal surveillance (dan dungjui a etkai na ) um tou peh thei nalai di'n gingtat huai hi.
Eima gamtatna ziah a mansuo thei di'a hing um ding a ka gingtat khen khat ahileh Indian Passport tanpha lahpia na, sepna suina tanpha a mai bing na, chipen police in verification ang bawl chia illegal activities history neisa chi'a chiemte na, lam tuomtuom a maibing na chivel tanpha hing pieng thei dinga gingta nalai kahi.
Thukhupsitna
Tam a tunga ka sil gelte ahileh tulai huilandan ka ngaisut sut chia tambang sil hing pieng leh kilawm kasah khen khat kang kup ahi, koi kapna leh koi mawpaina hilou in, keima mimal ngaisutna hing piengkhia ahizaw hi.
~ Pupu Zou | 04062019
No comments:
Post a Comment