Sangnaupangte'n i bawlkhiel jel khat khu exam kuonchia laisim kipat ahi
~ Lalminlian Zou, Topper, AISSE Manipur
All India Senior School Certificate Examination (AISSE) 2019 laivuonna guoltungtuonna sangtah hing mu ban ah Manipur state pumpi a topper hina hing tang unaupa Lalminlian Zou kungah Zolengthe leh Zolengthe ngaina tu tengteng in ikipahpina uh etsahna in Kalaisai i sam uh ahi. Lalminlian Zou ahileh St Paul Institute, Churachandpur ah ana kai a, Arts stream ah 483 marks (96.6 percent) mu in Manipur pumpi ah topper in pang hi.
May 14, 2019 ni'n Director of Education, Manipur, Th Kirankumar, Deputy Secretary Manipur, Regina Hongray leh president of CBSE Affiliated Schools' Association, Manipur te telin CBSE Affiliated Schools' Association saina nuai ah Classic Grande mun ah kipahpina ana neijouta uhi. Tam bang a guoltungtuonna hing ngah unaupa houlimpina Zolengthe Adminte'n houlimpina saulou kibawl a, thanuam tah in sim chiet vaile.
ZLT: Tutung na lawchinna Team Zolengthe in nahpitah in kahing kipahpi ua, maban a hing lawching tousem di'n ka deisahna uh ka hing puoh uhi.
LML: Pasian min phat in um hen aw, Lungdam mama ing ei.
ZLT: Nang leh nang bang na chi kimu ei? (How would you define yourself)
LML: Kei le kei kahileh Pasian taa a kimu ka himan in ka lungneu ngei sih hi
ZLT: School kaina leh nana khosahna munte uh hing gen vawi le.
LML: Ka sang kaina ahile Nursery khu Tuining khuo a um kapa oja (sangsye) ahina MELC Mission School ah kana kai a. Tualeh class A ahileh Tuining mama a Catholic school ah kana kai hi. Tuaban ah Class B apat 10 tan Salt Brook School, Laizon Veng, Tuibong a kana kai hi. Class XI leh XII hi St. Paul's Institute, Lamka ah Pasian lungsiatna toh kajou hi. Tam ka kainate ahileh Class Nursery leh Class A khu Tuining ah kajou a, tua sung teng in Tuining a ka khosa uhi. Class B apat 10 tan tana Lamka khopi (since 2006) a kazou hi.
ZLT: Na family background uh them khat hing kum vawile.
LML: Kapa ahile tu-le-tu in Pasian leh hattuomte deisahna toh Cashier, MELC Office a pang lel lel ahi. Tualeh ka u ahileh sorkar nasem sepoy ahi. Pasian mapuina toh hausa sih uleng zong mite eng di'n Pasian in ang koi sih hi.
ZLT: CBSE exam final adia bang chi ki prepare, na study practices hing kum vawile.
LML: CBSE exam adi'n ahileh lekha peen pawng sim a sim kahi sih a, kasim khate thei chet tinten kasawm a, sim chitah in kasim hi. Hunpiah dan zong gen tangpi di um lawm lawm in thei tuon sing, sim di tam dungzui a ha sim kahi mei hi.
ZLT: Maban a CBSE aspirants leh sangnaupante kunga na gen nuom bang a um ei?
LML: Advice ka pieh ut peen ahileh malam simlai te adia mite dem a sim sang in ei-le-ei janni sanga siam zaw teitei ding a pan lah di chi khu ahi. Tualeh gen dang nah ah nichin lesson te khu ani mama a sim di, tua ahisihleh subject a chapter teng i oja ten a'ng zaw pi chie inn a hoitah a et a thei di poimaw ahi.
ZLT: Maban ah bang tupna na nei eile?
LML: Ka hinkhuo a ka lam-et ahileh Pasian phatsah sah na, ahun tawh a a'ng pie penpen kipa tah a laah di kahi. Tualeh malam hun a ka tup-le-dei leh lunglut ahile Civil Servant hoitah khat a seem a tuaban ka hitheina khamkham a Pasian lungdei na bang a sep ding, tualeh i mi i nam thamlou in mipite dihtah a ki thuapi utna lungsim ka nei.
ZLT: Tulai khovel michin ngolna electronics, mobile games chivel na kimawl ngei ei? Na mudan bang?
LML: Tulai mobile games kei zong kaki mawl tham hi. Hinanleh ei mama a sil kingaa ahia, hun hawm dan siam mama ngai ana hizaw dan ahi.
ZLT: Lawmngai na nei ngeitai?
LML: Lawmngai chi peen tutan ngai nai sam lou, azieh ahile bangma dang ahi sih a kei adia ahun nailou di'n ka pom mei hi. A ngai ut pawngsan zong hisam lou, hinanleh a hun tung nailou chimei didan ahi.
ZLT: Student life sunga social activities/khanglai lah vel a kihal bang ngaidan na nei ei?
LML: Student life sunga khanglai hi'n activities dang hi ta lezong kihal ding ma ahi, azieh Church leh society mah a kihing aki hichieng in; ahi'n siemzil nalaite dia hi a laisim na uh Pasian ban a akhat na a akoi ding ua ki phamaw ahi. A hun leh amun zil a ki adjust siem poimaw kasa.
ZLT: Na result na thei un na nu-le-pa bang a chi um uai?
LML: Amasa'n result ahing suo suo in kanu toh um kahia, marks en a kanu kunga kagen chien leh kipa in umdan dih theilou khop in ka um uhi. Kanu'n kipa seng in thumna anei pai a, tomlou zou in kapa Office a um ka call pai a percentage kahil le kipa seng inlang hing peikal a ngahla hial hi.
ZLT: Masanglai apat laisiem mawng khat nahi e leh?
LML: Pasian mapuina toh kaneu apat lai lam ( academic) lam ah ka record te ahoi thei thou a, ahi'n tami XII result tan bang a kana sang kaina um naisam lou.
ZLT: Sangnaupangte'n board exam di chia a bawlkhiel jel khat ua na thei a um ei?
LML: Kei ngaidan in sangnaupang te'n Board exam kisingsahna ( Preparation) bawl di, hinanleh exam kuon a laisim kipan chipen bawlkhiel mama ahi uh.
ZLT: Manipur state sunga na laisimna hing subuai mama khat a na thei bang a um ei?
LML: Manipur sung a buoihuoi kasah mamate lah a khat ahile frequent bandh ahi. Tami in daily routine chou hilou in sangkaina zong suhbuai chitah in hing subuai in thei ing..
ZLT: Manipur ah Politician ngaisang deu na nei dan ei?
LML: Kei kahile politics lam ah ka lunglut seng khol sih a, tuazieh in ngaisang dieh zong nei vate sing e.
INNSUNG MITE
Pamin: Tutzamung
Numin: Manneikim
Sanggam numeite: 1) Chiinhoiniang 2) Mangneilun 3) Niangmuanching
Sanggam pasal : Thangsuanlam
Pienna khuo : Tuining khuo
Tenna khuo: P.Kamdouveng
ZOLENGTHE
Connecting the Zo people
No comments:
Post a Comment