Khovel pumpi'n kum tenga June ha sunga Pasianni a thum veina khu Pate' Ni chi'n pate pahtawina leh pate'n pa ahina uh lopna hun in 1910 apat in ana zang zing uh. India gam ningtawng Manipur state leh gamgi zul tanpha ah kum teng in akizah dan thupi deudeu a, kum dang sangin a te-akhang in theipha ta hi.
Kum tampi kana zah vangin tukum a Pate' Ni khu lamdang tah leh ka gingtat banglou tah in kana zang kha mawh ta hi. Ka pa'n a'ng beisan nua, kum 38 vel bang peita ma nanleh tutung in Pa neilou, taga ka hi kilang dieh in ka thei hi. Ka toumun ah ka ki ngaitua dedu a, ka pa ana dam nalai hileh bang ka chi hinkho man de aw, ka pa um nalai hileh ka hinkhuo genthei tah pi ana um sam lou di hia chivel pou ngaisut in kana nei den hi.
Social media ka luta, mite a pa toh nui siusiau a lim kila, ana kawi a a bieng tawp chivel ka mu a, kei pa vaimang siamsil tunga tongkup theilou a sahmel ka en a, ka nangeh hing na in, ka luonhi toh kidim man kahi lam ka hing kithei doh hi. Pa aw, mite'n apa dam nalai toh lim kila a, nui siusiau leh kipatah a a um lai ua, aw kei bang di'a nuipi ding neilou ka diai chi'n ka uonhi ka nul hi.
Ka pa mel, duong leh pienzia kichien tah thei manlou hinanleng, tuni'a ka pa ka ngai bang a kana ngailam ka thei kha nai lawm lawm sih hi. Mite'n Pate' Ni lim leh kipah tah a azah lai un kei a ding in luonhi luonna leh taga ka hilam ki thei chetna ni a suodohta hi.
http://zodawnfootprints.blogspot.in/p/epitabh.html
No comments:
Post a Comment