Election hing tung jel, MLA kiheng jel, Nampi kuong tawlna ah MLA leh Nampi lamkai UZO lung kituotah a nam khantouna ding tawlkhawm ngiitngiat chi jalouna sawt simta mama hi. Nam khantouna dingin Manipur inpi a mipi sih-le-tang a tou MLA leh nampi kuongtawl, etsahna dingin UZO, ZYO leh ZSP toh kithu ja mat den a nampi kuong tawlkhawm poimaw ta mama hi. Tam bang a i luongkhawm theilou laisie uh collective leh inclusive developmental work chi umthei ngeilou ding a, tua malah salah ah ki tuol ngiem deudeu ding ahiman in ngaisut tham ching sa mama kahi. Zou context in etsahna tamlou pelei ut huai kasa.
Laisimna toh kisai maban a UZO, ZSP leh MLA luongkhawm a panlahna di'a lunggul khen khat ahileh.
Mun dang a poimaw lou ichina hilou in, Zou kuol sunga school piching, a diah in government school umsate puothana di'a poimaw kasah tinten khuo 3 um hi. Tuate ahileh:
1). Behiang - Tam pen tu a sitting MLA Pu Ginsuanhau in UZO President ahilai in tu a UZO President Pu Chinlunthang Zou pen Education Committee Chairman in ana pang a, ama ngaikhawhna toh UZO Program & Policy ah guon in ana um hi. Mi kiphalte apat donation ana mute utoh kitoudel in ana hing liiliai hi. Tamna school ahileh piching kuon mamata a, phungvua tou jel a poimaw laitah ahi. Pu Ginsuanhau zong a kipat tunglai in laipuon leina ah ana pang ma nanleh MLA a hinuo in kinep bang jou nawnlou ahiman in dahuai mama hi.
2. Muallum - Muallum khuo zong Zou kuol a ding a kholian leh lailung khat ahiman in school pichin khat dinkhiet poimaw hi, UZO panlahna toh ana sepsa uh umpen juitou a, Pi Grace Zamnu MDC sep maba leh hattuomte panlahna teng a lampi khuot a school piching, Govt school khat meimei um sah hithei leh bang zatah in i gam in a phattuom pi tadiai!
3. Sangaikot - Sangaikot block sungah kum tampi peisa in school hoi mama ana um kha nei them hi. Tua hunlai in Imphal lam apat in zong student tam tah ana kai them hi. Hinanleh tuchiengin ahileh school hoi genta lou, a gina tah a school kaizing thei ding um seng nawnlou ahiman in, tuami kuol a mi chin in a delpha ding Sangaikot ahisihleh Tuining a Govt school umsa pen puokha in umthei leh uthuai mama hi.
Govt school pen puotha ngai, tuachilou in i Zou kuol ah fee pia toh thuo a school kaisah chipen Zodawn lamte'n hamsa sa uhi. Tam pen UZO Program and policy khat zong ahiman in tua hing kitel ding MLA leh UZO, ZSP in mapan khawm in pan hing la thei leh uthuai ka vatun dan kahi.
Rengkai Govt high school leh govt school dangin state level tan a pahtatna a mu ua, a bawl thei uleh en zong bawl thei nalou ding ima? Lung kituatah a i pankhawm thei pou leh I gam a umsa govt school te puotha hamsa lawm lawm ding amah?
Tami bawl thei ahina ding in Solkal toh kizop ngai, solkal toh kizopna ding in mipi palai hoi khat poimaw a. Mipi palai hoi neitheina ding in mipite'n thuneina lien penpen kitawi hi.
Tam bang plan lawching tah a sepkhiet ahitheina ding in nang leh kei khut a ki nga hi liuliau ei. Issue based a vote khiet khu khantouna ding in poimaw tazen ei, guai!
No comments:
Post a Comment