11th Manipur Assembly election hugin ngai semsem, political party teng lah a tam theitawp ching teitei ding chi in ahitheina chinteng ah panmun khaw in khuoi vaitung bang in diengle zatzat ta uh. Hotel chinteng lah election thu houlimna dimta, social media chinteng lah election thu a dim, tua bang kawmkal ah tutung election in political change ang tun jou na diai chi ngaisut kham ching mama khat ahi.
Bharatiya Janata Dal in Manipur Chief Minister Okram Ibobi Singh lamkaina nuai a Congress government in kum 15 a vaihawmna suonkhiet sawm in bawl thei chinteng, gen thei chinteng, sa thei chinteng a panla in ki salel mama ta uhi. Indian Prime Minister Narendra Modi zong hing dieng suh sawm nalai hidan in thu kija hi. BJP in Ibobi vaihawm kum 15 sunga fake encounter umte, vaihawmna kisuhlou, khantouna umlou leh namte kal a kibuoina chite tungtawn in vote campaign bawl ua, alang khat lam ah Congress government zong kumuong simthou - lah ki muonglel sim veve dan a lang in pan nasatah in la veve uhi. Congress in ahileh Indo-Naga Framework Agreement tungtawn in vote campaingn pan ua, nidang a phaijang gam a teng Meiteite lungsim su geugeu thu-le-la, Naga issue te tungtawn in BJP te demna toh panmun khaw in, government form kia ngeingei ding uh ahidan uh tangkoupi uhi. Tua kawmkal ah, political party neuneu te'n coalition bawl in guolzaw kinem chiet uh ahidan muthei in um hi.
Sil umdante et in, tutung election in change/kihenna ang tung jou tahtah na diai chipen gen hamsapi khat ahi. Political party tuomtuom te'n a candidate ding ua party ticket a piehte uh i etleh a tamzaw politician lui ngen hinalai ua, MLA khatvei ana kaisa tam mama nalai hi. Political party tuomtuom te'n ticket a hawmna uapat et in 30% vel ahileh meltha umpha dan a tuot ahi. Tam meltha ticket pieh a umte'n gam ang la jou na di uai? Politician laisiem leh sisan tha bangja ang kitung doh jou diai?
Election hun teng in free and fair hiding chi hideu zing hi. Tutung in zong free anf fair hiding chi genkha in um jel, tuami ahitaleh singtanggamte ah free and fair ahi tahtah na diai? Solkal in helpawl SoO nuoi a umte khum chimit ahitheina dingin a mun chiet ua vote khiet theina ding lampi sui ua, alang khat ah helpawl thautawite'n booth capture ang bawl dinguh muonmawna lienpi houlimna tangpi hi jel hi. ECI in bang chi'n pan ang la diai chipen michin bildaw ahita hi.
No comments:
Post a Comment