An adequate conception of development must go much beyond the accumulation of wealth without ignoring the importance of economic growth, we must look beyond it (i.e. freedom).
– Amarty Sen (The perspective of Freedom).
Leitung muntuom tuom a mihing million a sim genthei liangvai simsenglou in kidim hi. Neh ding ann neilou, damlou ki-enkoljoulou, shina manna tuoh, neh-hoijoulou (undernourishment), siamna pilna ziljoulou, sepna neilou leh basic needs dangdangte buchin zoulou adim in um hi. Tuate lah ah eigam(India) zong telpha hi. Atomlam a gen in tabang tasapna Economic Bondage/unfreedom a kikhosa nalailai tam mama china ahi. Gam khenkhat adieh in socialist & communist gamten zawnna doudal leh suh bei diing chiin mimal zalenna botkhie in, gamsunga mipite nei leh lam hausatna kikim a homguol ding in pan ana la uhi.Nanleh ana lawching jou senglou uhi.
Tuabang gam ah vaihomtu/govt thuneina lian mama a, mipi thaneina neu mama hi. Tuami deikhop nailou in agam ua namtuomtuomte political rights sukhietsah in, group/political party khat mai in vaihawmna teng leh thuneina teng tuden a, democracy kichi thumal muda uhi.
Hinanleh langkhat ah, Western gamlam ten liberal theory pansan in mimal zalenna, khotang leh namte/mipite zalenna(political, civil and individual liberties) phalpiah ua, tuathamlou in private sumsuinate piibawl in economic liberty/freedom michin pie ua, tuabang in gentheina leh zawnnate doudal ua, zong lawching uhi. Democracy leh capitalism peihpi gamte genna ahitangpi hi. Ei India in democracy peihpi pum in bangtan e khat economic lam a mite kikim theina ding dei in socialist path jui veve a, tualeh atanga koima gamtum dingjou leh ding theilou ahina toh nasatah in capitalism/globalisation lampi jui zomtou hi. Tua banah mimal leh nam/mipi chituomtuomte khantouna ding zalenna zong Danbupi ah giellut in jui thei tan in jui sawm hi.
Mihing khat hina ah zalenna-buching (holistic freedom) idei hi. Tua khu personal & economic liberty ahi. Political thinker John Rawls in “priority of liberty” agenna ah tamtegel apoimawpen in ana koi hi.
Tu in itenna Manipur ah tami zalenna tegel inei uai chi kidong talei. Mimal neh leh dawn suina, summeet bawlna, sepna tuomtuom leh nei leh lam ah bangtan e khat zalenna um a, mineijou, apil asiem zong kibelap hiai hiai hi. Hinanleh zalenna buching ahi ichi theinai sih. Zalenna tahtah penchet umlou pia sum-le-pai tampi nei a hausa mama ina hikha thei, tuakhu sil jauhuai ahi. Igam ah solkar a sepna kidei chiet a, amuna ding in bangteng bawl in, lampidih/dihlou umlou in jui kitum chiet mai hi. Sum leh pai piah ngai a, tuamai hilou in milien-milal nei ngai hi. Aneiloute ding in‘chance’ umlou hi.
Igam ah pvt. enterprise tuom tuom leh company/industry te patkhiet thei in umlou a, agammite hi in, gamdangte hileh ‘small to large scale industries’ kipan thei lou hi. Ajieh tuom tuomte um ding a, hinanleh a dahuoi pen khu gamneimi buoina/nongkaina khu ahipen hi. Tuajieh in khanglaite beidong in, aza-asanga simte gamtuom kipei a, theina leh siemna tamzaw igam ah zattheilou suah hi. Mitaga-mizawngte a dia scheme tuomtuom hing lutte atamzaw phiel atunna ding mun tung lou in kihei-kawi jing hi. Mitamzaw adih leh dihlou, asieng leh sienglou chi umlou in sumduna in kipum dim hi. Ahaute hau semsem in gentheite genthei semsem ta ahi man in genthei-hausa kikaal (gap) lien mama tahi.
Kum 5 dan a Assembly a ipalai ding MLA/MP/MDC a ineite uh eima thuneina toh zalentah a iteel uh ahilou man in amipite tungah kisuonglana/kiphatlamna leh mopuohna (accountability) nei kisa nonlou in, thautawite ma pii bawl in poimaw ngai zaw uhi. Democratic-India huang a I um hang un itenna Zogam(ichijel) ah I basic political rights nasan zalentah a zang theilou inahi uhi. Hattuomte nasan in zong thudih thutang peipi ngamlou in khovel peidan in naahpitah in jelh in lungbuoi gawp ta uhi. Tuajieh in tabang dinmun pen a ‘zalen’ (free) akichithei ngei sih ding a, saltang (bondage) ihi dan uh kilang hi. Bill-3 buoina khu a‘climax’ (atawpkhawh) ahi.
Election Politics dihtah khu welfare/development work paulapna maitoh hilchet (define) a hun ahisih a, Dan bawlna (legislation) thupi zaw hi . Tuate genlou a aumsa(masanataba) ahilel hi. Freebies kichi gamvaihawm ten mipite kung a thawn a pieh dia achiem uh silte china ahia, tami freebies kichiem khum zing in bangma tan hing tunlou ding hi. Thawn a mu thawn a beimang, chi thupiltom khat ana um hi.
Politiciante kunga aloutheilou i ngetdia poimaw khu infrastructure/khantouna jungpite – road/connectivity, meivah, tuineh, etc. te banah, igam ah neh leh dawn sui theina(means of livelihood) ding farm, cottage & small scale industries, skill/training centers; business patkhiet theina ding jungpi, loan leh permit tuomtuom, bitna leh muanna(security) chite hihenlen, adang eiman kidel hileh awl-awl in dihtatna nasep khat hing kipan thei pan din gintat huoi hi. Ichit leh chitlou thu hilou a MLApa/nu jui man a Kam(job)nget teitei ding, ahisih leh sum toh lei sah ding chite igam a nehgu kipatna ahi. Mizawng-gentheite tanding a lawm langva, solar, toilet, ichite gen ngailou a aum ding sa leh amuding lom ten amuthei sil ahilel hi. Tuasang in I ipolitician ten bangchileh mimal leh mipite neh leh taah suina(means of livelihood) hoijaw ang patpieh thei diei, chite buoipi a, sawtpi daih ding long-term policy ilam-et zawh hun ahita hi.
Tuabanah, tuate saanga sangzaw ineidia poimaw (iphawhphah lou) ahileh personal leh political liberty (mimal leh kivaihomna zalenna) te ahi. Mimal khat leh minam khat hina dol ah, I political leh civil rights hing kilahpi ding sil jauhuoi penpente lah ah khat ahi. Tuami rights umlou in agammi-hina (citizenship) kineilou china ahi. Itenna leitang (land), gam (territory) leh iminam hinate (political identity) ipoimaw ngai leh ikepsiem hun uh ahita hi. Tualou in minority ihina toh khatvei chiang in igam-inam nehmang in ki-um thei ding hi. Tamte khu isum-ipai ngainatna maimai, eima mimal leh innsung meetnate saanga poimaw zaw leh manpha zaw ahidan thei hun tahi. Tuajieh in Nobel Prize winner Amartya Sen in, “Khantouna kiningching zaw kichi khu nei-leh-lam hausatna mai a hun ahisih a…tuami nelsie lou a, tua khellam a silpoimaw umte zong ahi” ana chi hi. Tuami khellam a um te khu: zalenna tuomtuomte (personal, civil and political liberties) genna ahi. Tuajieh in Economic leh political rights kijui poimaw a, khatpen pen umlou in mimal leh minam khat buching theilou hi. Politician/leader ten itenna gam-le-gua leh leitang te humbitna din mopuohna nei masapen uhi.
Tu in imai March ha sung in MLA(danbawltu) election inei ding uhi. Tuanah nang leh kei in bangchiin I right izang diei? Free tah in ivote ikhethei diei? Ahisihleh bangchibang in ikhe diei? Nidang a khiet ngeina bang in ikhe nalai diei, sum themkhat toh ivote i khawng lel nalai diei? Ahisih leh ngaituona tha vilvel nei in maban a imimal, ikhotang leh igam-inam buchingtah a zalen thei na ding deina toh ivote pilvang in ikhe diei? I vote khietdan i heng lamdang deu ta diei? Koi ka vote manpha peleng mailam hun ah dihtatna toh kanehsuina ahing vangthei in, kagam leh kanam (political) zalen thei na’ng Dan ahing kibawl thei, mipite i bitzaw diei? Chite lunggil a ngaituo pum in I vote khe vai.
No comments:
Post a Comment