ZSP Foundation Trust Meritorious Award 2015

ZSP GHQ IN ZSP FOUNDATION TRUST MERITORIOUS AWARD 2015 HAWMNA NEI

Monika Niang It Hoi Tungdim in overall ZSP topper hina la

Lamka, June 27: Zou Sangnaupang Pawlpi GHQ in tuni'n Zogal Memorial Hall, Zoveng ah ZSP Foundation Trust Meritorious Award 2015 hawmna leh career counceling nei. Vaiguon dan ni in kikhen a, session masa ah Dr. Steve Minlun MBBS, Medical Officer incharge, Behiang PHC leh Lunzamung Tungnung MPS, 2nd IRB assistant commandant te'n Career in Medical Science leh Civil Service chi thupi zangin sangnaupang tamkuom tah toh career counceling hun zang ua, second session ah Award hawmna leh zingunte apat thugenna um hi.  

Tam vaiguon ahileh Pu Ginsuanhau, MLA Singngat A/C in chief guest hina toh uap a, Muallum MDC Pi Grace Zamnu leh teltha a um Singngat MDC Pu Hausuanthang leh Sangaikot MDC Pu Pumtulthang te guest of honour in pang ua, Pi Mannuamching MCS, CEO ADCC in Functional President hina toh uap in, Chief Host in Pu Chinlunthang President UZO Ghq pang hi. Tam hun ah ZSP Anthem ana phuo Pu Thongpao, ZLS Official Dr. Lachinkhai, Pu Nehkhojang ban ah UZO Cabinet member leh ZYO lamkai te tel in MZP, KZP, KSO, TKSU ban ah ZSF leh CDSU te'n zong lumtah in uap uhi.

Dr Steve Minlun in thumapui agenna ah, I lawchin nuom leh I materialistic lifestyle hen ngai dinga, sangnaupang laisimte di'a virus lienpen ahileh social networking chinteng umna mobilephone ahi chi hi. Tualeh laisim laite'n lawmngai pen ahithei tan a kisum poimaw a, nu-le-pa jatat pen lawchinna thugu ahi chi hi. Sangnaupang khat in social life leh student life khensiem poimaw a, a poimaw pen ahileh Pasian thei ahi chi'n a seminar 'Medical Science' toh kisai thuhilna nei hi. Pu Lunzamung Tungnung in ahileh a seminar paper apatma in, sangnaupang khat in a lunglutna a theichet poimaw ahidan gen a, civil service aspirant khat in ni khat in atawm pen a naikal 5 tei laisim poimaw ahidan zong gen hi. Tuaban ah niteng a national paper tatlou a sim poimaw ahidan zong gen a, sim meimei hilou a gel dan zong kizil poimaw ahidan nasatah in gen hi. A gen thupi pen ahileh a basic thei poimaw chi hi. Pi Mannuamching in thujetel agenna ah, khatvei ni vei hilou, tatlou a laisim zing khu lawchinna khat ahi chi hi.

Seminar zaw in, award hawmna vaigion pat in um kia a, tuanah nu-le-pa, sangnaupang, award tuotute leh lamkai tamkuom tah tel uhi. Zin gunte'n thugenna aneina vuah sangnaupang lawching hina dingin guntuna leh chitahna poimaw ahidan gen tangpi ua, tuachi'n ZSP ghq Secretary Pu Chinkhenpau in award hawmna nei a, award khen khat la jou ding ZSP member te apat qualify umlou ahidan gen a poi asah thu gen pum in sangnaupangte'n hanchiem dingin hanthawnthu gen hi. ZSP toppers meritorious award 15 um a, tuate apat award 6 la ding qualify koima umlou ahiman in hawmlou in um hi. Award mute ahileh:

1. Rev T Doupu Memorial Award | Cl-X Zou MIL toppper - Niangngailun d/o (L) Lamkhopau & Paumuanching of Chinkham Modern School (94 marks)

2. Pu Thangkhanlal Meritorious Award | ZSP Cl-X topper - Margaret Khawllianmawi d/o Sebastian Lunsuanpau & Felicita Chinghoikim (91%) from Donbosco High School

3. Pi Vungkhoching Meritorious Award | ZSP members if any among the Manipur Top 10 in Cl-X - Nill

4. Kapu Saipu Award | Cl-XII Zou MIL topper - Biaklallian Zou s/o Ginzalam Zou & Thianphalching from Rayburn College (96 marks)

5. Pu Suohzahau Award | ZSP Cl-XII (CoHSEM) topper - Gouzamuan Samte Zou s/o Chinlunthang & Chingneilam from Rayburn College (76.6%)

6. Pu M. Tongzapau Memorial Award | Class X highest mark in Mathematics -Nill

7. Dr. Michael H.Taithul Memorial Award | Class X highest mark in English - Nill

8. Dr. T. Tongkhokai Memorial Award | Class X, Highest Mark in Science - Nill

9. Pu Lalpu & Haupu Meritorious Award | Class X, Topper in Social Science - Nill

10. Pu Thangzalang Meritorious Award | Top 25 rank holders in Class X & XII under any boards in India - Monika Niang It Hoi Tungdim d/o Dominic Kapkhanthang & Gracy Mansuannuam (7th Rank under Meghalaya BOSE - 93.3%) from Auxilium Girl's Hr. Sec. School, Shillong

11. Rev. David K. Samte Meritorious Award | Higest Mark in Arts Stream - M. Ruth Zou d/o M. Lawrence Zou & M. Jane Zou (72.2%) from Enlighten Knowledge Hr. Sc. School, Sangakpam, Imphal

12. Pu Thangkhenkhup Meritorious Award | Highest Mark in Science Stream - Gouzamuan Samte Zou s/o Chinlunthang & Chingneilam from Rayburn College (76.6%)

13. Pu Jem Douzakham Tungnung VCO/JCO Meritorious Award | Overall ZSP topper in Cl-X under any boards in India - T. Khupzamuan s/o T. Kamsuanpau & Manneiching (95%/Gr. A, GP 10 ) from Sutluz Hr. Sec. School, Rajasthan

14. Pi Chinniang Meritorious Award | Overall ZSP topper in Cl-XII under any board in India - Thanglianpau s/o Kamlianmang & Huaineikim from Jaipur Army Public School, Jaipur

15. Elder T. Gougin, Father of the Zou Meritorious Award - Topper in Commece Stream - Nill

(Pu Thangzalang Meritorious Award chilou adang teng ahileh Citation + Rs. 3000 pieh in um ua, Pu Thangzalang Meritorious Award in ahileh Citation leh Rs. 10,000 pieh in um uh.)

Tam vaiguon a zingun Pu Ginsuanhau MLA Singngat A/C in a thugenna ah, Zou nam khantouna di'n lungthu banga ZSP, ZYO leh UZO a dinkhawm poimaw ahidan gen a, sangnaupangte kungah award sang mei mei a lungkim lou ding in hanthawnna nei hi. Tuaban ah Manipur govt nuoi a MBBS zil theina di ST quota 200 huhdim a um joulou ahi dan zong tahlang hi, tam toh kisai a CM in bial MLA te'n a biel chiet ua medical lam a lutdia sangnaupangte mobilize bawl di'a ngetna bawl ahidan zong gen lang. A genjelna ah tulai kham/sepna ahileh merit list a kila tham ta ahi ban ah Govt in kham hing la zung zung ding, opportunity grab thei dinga ana ki singsa di'n chielna bawl. Zingun pu'n agenna ah tate laisimna ah nu-le-pate'n panmun khaw tha in kha pet vai chi'n zong ngetna bawl hi. Manipur or outside Manipur a BA/BSc pass te kibang, inn mun a simte zong koima sanga ngiem zaw lou ahi chi'n sangngaupangte kungah hantawhna bawl a, UZO education policy law ching leh nasa pia puotou poimaw nalai ahidan gen in ahun jou hi.

Chief Host a pang Pu Chinlunthang, UZO President in a genna ah mani talent/interest line thei masah ngai ahidan hilchetna bawl a, tulai nu-le-pate'n a tanute uh Nurse tan mei mei mu a chil ahidan uh talang in, nurse tunglam tan tungthei dingte lungsim ah a ngiemzaw chitu in nei sih vai chi'n chielna bawl hi. Sangnaupang khat ihi leh second option pen a lou theilou a nei poimaw ahidan gen a, i first option i tunzaw lou le zong second option beh a um sawm tei tei dingin hantawhna bawl hi. UZO in education policy nasapia peipi ahi ban ah, Behiang ah bangtan a hiei khat lawchinna umta ma leh Muallum leh Tuining a high school tan koi tei tei tupna UZO in nei ahidan talang hi. Tuaban ah maban ah Zou Artist Union te toh kithuo in Sing for Education campaign pan nalai ding uh ahidan zong pulahna nei hi.

Singngat MDC Pu Hausuanthang in a genna ah, tua lawchinna mei a lungkim lou a, maban kal suonna dia step a la dingin sangnaupangte hantawh, sangnaupangte khu Zou nampi sunga change tuntu dingte ahidan gen lang in ama zong sangnaupangte tawhthouna ding ahipou leh kum kia cieng apat AWARD DONER a pang ding ahidan zong tahlang hi. Sangaikot MDC Pu Pumtulthang in lawchinna thugu ahileh ginumna, kukalna leh sienthouna ahi chi'n tomkim tah in thugenna nei a, Pi Mannuamching CEO ADCC in 'laisiem lou ki siemsahte pen I nampi a dinga khanmaw baw lienpen ahi, beauracracy lam ah mi'n sepna mu zung zung, ei a gap saupi um, bng jie ata diei? Nam it le ngaina I kisah leh kangnouten pan latha vai, politics ah ngol sih vai chi'n thupatna nei hi. A genjelna ah, laisimna lam a eima ki discourage lou ding ahiban ah, sum sunlou a muthei kham tampi um ahi dan zong gen hi. Tuni'a ZSP gam pumpi a tungtuonna ngah sangnaupangte kungah maban a zong tam sang a sangsem tung ding in challenge bawl a, laisimna mun leh muol zieh a ki ngaingiem lou ding ahidan gen in, laisiamna i chi eima a kinga ahi dan zong gen hi.

View more pix at https://www.facebook.com/media/set/?set=oa.902804866445769&type=1