Khristian Sakhuo zuite khut-le-khut kitu in

Manipur a Christian hing lutna kum 100 valta, Hindu sakhuo kulmut nag am ah I na tengkha ua, hinanleh hamphat huaitah in singtanggam a teng te’n Khristian sakhuo I na jui kha uh. Pasian in a’ng ngansiena, a thu puongja tu ding chi dungjui in hattuom chin in missionary I na sawl khe zeng zung ta uh, I missionary sawl khiet teng uh sim ding hita lei, Manipur sung sangin a pulang a I sawlkhiet tam zaw mei thei hi.

Pupa thuchiin khat in, ‘innguo leh gam guo’ ana chi a um ngei hi. Hoita’n ngaisut lei, I inn veng, gam mial tah tah a umte ngaisah lou in, Manipur pulang ah inei I lam uh sengin missionary tampi I sawl uh, a hoi sih I china vang hi lou, hinanleh ei ma state sunga gammial meipi bang jing lam a tha in gel tha lei a dei huai. Manipur ah hill district tengah Kristian sakhuo a tam zaw I hita, ahita leh singtanggam a umteng in phai jang a gingloute ki beihuan lei bang chituh in gam I la ding uai chi bang ngaisut tham ching kasa hi.

India sungah BJP in India phuolpi vaihawmna ang la ni apat in Khristian sakhuo juite tungah hahiamna leh gamtat hoilou mu thei leh simthei hunkuom tah um ta hi. Manipur sungah en kia talei, kum chin in Meitei gingtute tungah gamtat hoilou leh, biehinn leh Pasian nasemte tunga khut ha chivel a um zing hi. May 10, 2009 ni'n  Phayeng, Taothong leh Phumlou ah Biehinn thum hal tum in ana um. Tam mun ah van Rs. 3 lakhs man vel haltum in ana um hi. Tam bang gingtute tung a gamtatna phuolsel a um jou nawnlou in, ahingtung ding June 6 chieng in War Cemetry gei a um Presbyterian House apat Hapta Kangjeibung tan Meitei khristian pawl in lungkimlou etsahna in lampi juina nei ding uhi.

Meitei Christian te’n Peace Rally aneina ding ua Committee Chairman Rev. Dr L Iboyaima Singh in, Manipur, adieh in Meitei Chritian te helpawl hi in, mi gilou khen khat apat hita leh suhbuoina ki tuo zing chi’n Press Club a press meet anei ni’n ana gen hi. A genna ah, kikhoplai a biehinn suong a se chivel, biehinn lam ding phallou, pastor quarter bawl ding phallou, biehinn ki halsah chivel a um zing ahi. Tam teng a bei ngai ahi chi hi. Rally anei ni chieng un, `We trust the God`™, `We stand for Peace and Unity`™, `We are Peace Loving People`™, `Church is a place of Worship`™, `Please Stop Burning the Churches`™, `Please Allow Church Construction`™, `Please lift up banning of church construction works`™, `God founded church, let us honour God`™, `Save the church to see life and future`™, `Church has the solution`™, `Manipur shall be saved`™, `Please stop mob injustice against churches`™ chi slogan toh Imphal kholai a khristian te kikou ding uh ahidan zong talang.

Ei singtangmite sanga Christian sakhuo juinukhia zaw, Meitei te’n tam bang vaiguon a bawl sawm tau a ahileh, bang chidan a Kristian sakhuo ana jui masa leh a etton te un support na thu khat be puong lou a um an alai di uai? Bang chi dan a tam bang sil a tun chia a district wise, church level leh denomination level vel a condemnation um ngei lou a diei? 

Tam bang hun chia I pankhawmna I suo thei lou leh I tenna gam, Hindu tamna gam ah nuoi sie in ki um zing ding hi.

-------------------------------------------------------------
FOR YOUR INFORMATION:

Tour report of Manipur by Dr. H.T.Sangliana, Vice Chairman, NCM, between 4th and 9th May, 2012

http://ncm.nic.in/pdf/manipur%20tour%20report.pdf