Pu PC Lawmkunga, na chitna ngah in mipi a nuoi valte’n bil daw
Government of India, Ministry of Home Affairs (North East Division) in May 7, 2015 ni’a “Extension of the Sixth Schedule of the Indian Constitution in the Hill Areas of Manipur,” chi thupi zang a Manipur chief secretary P C Lawmkunga alaithonna ah, undersecretary to the government of India, Manohar N Sukole in nisim 07.04.2001 ni’a Manipur Government in hill districts a Sixth Schedule with local adjustments leh amendments them khat toh koi ding lemsa ahi dan talang a, tua dungjui in Ministry of Home Affairs in zong nisim 21.09.2001 leh 17.10,2001 in Manipur Government kungah 6th Scheduled in a huomkha ding mun-le-muol kichien tah guonggal luikhe dingin thupieh ana bawlta uhi. Am thu ahileh W. Nipamacha Singh lamkaina MSCP solkal vaihawmna leh tuazaw a Koijam Radhabinod lamkaina Samata Party government hun, 2001 lai a thu um ana hita hi. A laithon in agenna ah, India phuolpi’n laithon ni vei thot nanleh Manipur government in khatvei zong thuhna ana bawllou ahi dan talang a, Manipur government in tam laithonte a thuh kia ngai ahidan zong gen tel in nei hi.
Ministry laithon pen ‘Most Immediate Parliament Matter’ chi’a sut in um a, reference no. 1303/11/2015-NE.IV chi’a chiemte in um hi. Tam Home Ministry apat laithon in chiengtah in hill district teng ahileh 6th Scheduled nuoi a koi ding ahidan chiim kilkel in gen tel hi.
5th September, 2014 ni’n Manipur apat ADC member khenkhat te’n Delhi kiphinna mun Jantar Mantar ah Indian Constitution dungjui a 6th Scheduled apoimaw na mun mun a koi dingin kiphinna ana nei ngei uhi. Ningkum August 30 ni’a India Prime Minister Narendra Modi kunga memorandum ana piana uah, Manipur (Hill Areas) District Council (3rd Amendment) Act, 2008 dungjui a subject 26 te ADC thuneina hi ding chi hima leh tunitan a akim khat sanga tamzaw mawpuohna pieh hilou ahidan ana gen lang uhi.
Manipur singtanggam a 6th Scheduled koi ding chi’a kiphinna ahileh kum 35 valta a, Hill Areas Committee (HAC) kichi singtang MLA 19 umte’n kum 1978 in 6th Scheduled ngetna ana neita uhi.
Indian Parliament in kum 1971 in constitution Article 371C dungui in the Manipur (Hill Areas) District Council Act ana passed ua, tam dungjui in Manipur ah district councils formed in ana um hi. A lim-le-mel dan in Council member ana hi nan uleh tunitan in legislative leh judicial powers ana nei nai sih uhi. State danga council member dante toh teka in Manipur ate ahileh a min meimei a council member dan in ana um tawn tung uh.
A lamdangna khat ahileh Manipur a ADCte ahileh 5th schedule zong hilou, 6th schedule nuoi zong hilou, sui generis kichi ama tanga chituom deu a ding velvol bang mei ana hi zing hi. Kitel deu a sui mite’n Manipur ADC leh HAC kikal a kizop matna neng khat zong um lou chi uhi. ADC act ahi ding bang pen Union government in passed ma nanleh kum 2000, 2006 leh 2008 a amendment umte ahileh state government in with local adjustment in ana bawl zing uh ahiman in, a thuneina uleh sum-le-pai tungthu a thaneina nei theilou chi ding ahimei hi. ADC amendment ana ki bawl zing nanleh kum 1989 apat 2010 tan kitelna ana um nawn kiikei lou hi.
HAC in kum 1983, 1990 leh 2002 in kum 1978 a ana demand uh 6th schedule ngetna ana bawl jel jel ua, state government in zong kum 1991, 1992 leh 2001 in ana recommend in commission ana guong sam nan uleh tunitan in gasuo in um nailou hi.
Tam bang kawmkal ah International Meeteis’ Forum (IMF) kichi pawl khat president RK Rajendro in Manipur a 6th Scheduled koi ahi leh state sunga buoina pieng thei ahi chi’n ana kamte kha ngei hi. A lang ‘khat lam ah laisiem khen khat in ahileh tam 6th Scheduled koina dingah India danbupi Article 371C tungtawn in India phuolpi’n thaneina sang pen tawi ahi chipawl um jel.
Tu in ahileh Manipur Chief Secretary Pu PC Lawmkunga in bang chi’n a’ng dawng in bang thu a’ng um diei chipen michin bildaw ahi ta hi. Thei ding khat ahileh SPF government ahileh tami provision pen adopt lou ding chi’a pan la zing khat ahi. (Pupu Zou)
No comments:
Post a Comment