KI KHAILUM LUM MEI DING MAW – BANG CHI PANLAH DING

There is, unfortunately, a real stigma surrounding mental health issues and the only way to get past it is to educate ourselves, to have open and frank conversations and to reach out to those who are suffering. 

I hawmthaw I khopi Lamka neunou khat sunga ha ni vei peisa apat natna dei huailou tah leh shidan kilawmlou, mahni hinna kilah chi thuthangte I za chiengin lung hingphawng ma ma a, chimul thaw bang huai hial hi. Hachin phial in kikhailum chi thu ja in um zing ta mei a, tua zong sangnaupang laisim laite hi deu uhi. Tam bang thuthangte I ja chieng in lungsim ah ngaisutna tampi piengsah a, Christian sakhuo toh I etka chiengin bang ginna juikha leh sep dingbang kisem kha lou a diei chi vel bang geldoh in um jel hi. I khopi sungah tam bang thuthang hehu tevel a um in umda thei le hut huai hima nanleh, mihingte hinna leh lungsim ngaisutna pen kibang kimlou ahiman in tam bang sil piengte bang chi dou dal ding chi lampang ngaisut poimaw hi.

Tam bang ngaisutna lungsim peisuo a um lengte bang chi panla a hoi ding? Koi teng in pan la ding? Bang level a pan lah ngai chite gelkhawm poimaw hi. Ei mite I hi leh maingallou, I lungkhamna zong ki kum ngam lou, beidong tawpkhaw a hinkhuo I zah nia zong a’ng houlimpi thei dingte zong ki zuon ngamlou khop a jakaina nei I hi man un, panlahdan ding pen gen hamsa pi khat ahi. HInanleh bang tan a hiei khat a phattuomna um thei dinga I gintat panlah ding dan ahileh – Solkal level apat, Hattuom level apat, NGO level leh CBO level apat in pan kila leh bangtan ahei khat be phatuom dingin gingtat a um hi.

Solkal level ah DC in panla in Counseling Centre chi khat District Hospital or mun dai dide khat ah hongin tuona Helpline number hoitah toh 24X7 hon in um thei taleh bang achi de aw? Hattuom level ah, Pasian dei bangin Pastor te’n house visit nasapi’n bawl in, local Upa te’n ka hattuom sunga koite koi, koite bang chi chite hing theisawm uleh aphatuom kha de aw? House visit I chi pen Pastor leh Hattuom Upate nasep pi pen hing hithei taleh a dei huai. NGO level ah Cognitive Behavioral Therapy chivel bang a panthei dingum ta henla, Helpline number nasadeu a advertise bawl thei bang hing um ta leh nasa pi’a phatuom ngei dingin gingtat um hi. Community Based Organisation – Youth Club, Voluntary Organisation leh a dang dangin tam bang silte toh kisai in I veng ah seminar bang nasa pi’a organize in line tuom tuom a chitna leh siemna nei mite resource person in kihan thei jel leh, hateng in bang seminar chivel organize jou lei bang ding a phattuom pi lou ding?

A langkhat lam ah: Pu pa hunlai banga tam bang shina tuote I koi dan uh gen tham ching kasa . I pupa hunlai in shidan hoilou leh sashi chite vel innsung a zong ki pawlut lou, lengkhawmna zong umlou, vuina vaiguon zong um lou, ui nou vui a ki vui chi lei ki genkhiel lawm lawm lou meithei hi. Hinanleh tuhun in tuabang a et dang pen mang hiai hiai ta maleh mun khenkhat ah zahin um sim sim nalai hi. Tam bang silte toh kisai Pupa thugousie ana um kha nanleh, Christian I hi dungjui un tam bang chindan pen a hi thei tan a suhbei hi thei ta leh uthuai I sa hi. Bang chi shi in shi lei zong I innsung mite’n a’ng itna uh inchi khat zong kiemlou ahiman in, I lungkim thei tawh a ki hakhiet pen peipi theilei a hoi diei chi bang ngaisutna ah hing pieng jel hi.

Source: Luna Guiters' Blog