Tu kum United Zou Organisation general headquarters Assembly leh kitelna lawchingtah a zaw in um, block 13 apat palai zanga val peikhawmte President Upa Nengkhenthang in vaidawn thugenna, a liamsate suunna leh UZO nasep leh panlah ding dan poimaw asahte talatna nei hi.
Presidential a address ah term peisa sunga sepkhiet leh toh doh talat bangma umlou a, policy program leh action plan pen umma nanleh hawmthaw huai mama hi.
Kum dang banglou in tukum in ahileh voter ID card bawl ahi dungjui in feltah leh kitup tah in kitelna in matal zung zung thei a, tam pen financial involvement umna nanleh maban a sutzop tuo mama in kilang hi.
UZO dan pulang a um, lamkai mi phabepte zong UZO sunga kituotah leh hatsem a nnasem khawm ding deina toh ngaidam puonna leh thukhun phelkhietna zong nei hi. UZO sunga dan pulang a koi/nawsuo chipen kum bangja vel apat in um zeuh zeuh zing hi, nam khantouna leh luonkhawmna daltu khat ahiban ah, lungsim ki chimatna daltu khat ahiman in ahithei tan a bawl hinawn da leh a uthuai hi.
Zou Lai toh kisai a genna ah, Zomi Council nuoi a um, Zomi Language and Literature Society (ZOLLS) te’n Zou Script pen Zomi Script dinga a nget uh talang hi. Lamkai luite’n saiman lou ahiman un a thate sai dinga koi ahi dan zong gen hi. Tam toh kisai pen Zou sunga intellectual group, literature experts leh akisaipi laisiem leh apilte toh guntah a ngaisut in um thei le hut huai mama hi. Khovel ah literature pen a living things chithei phiel in um a, mi kiletsahpi leh ki identifyna ahileh literature lam hi deupen ahiman in tampen guntah a ngaisut poimaw kha ding hi.
Audit report I ngai leh ngaisut ding tampi hing piengsah hi. UZO sungah sum-le-pai suina ding a lampi kawlou I chikha mei thei. Nampi kikhai khawmna khat sum-le-pai muna dingin hawmthaw huai bangsim hi. Zou population et in I financial condition pen ahithei tan a improve thei gingtat ahuai hi.
Zou tawndan (Custom) hoitah kinei pen michin in hoitah a juichiet ding in chielna bawl hi. Zou tawndan nei nam Zou tribe a chiemte a um I hi leh phung-le-tang in ina jui jel pai theilou khat-le-ni um nanleh a taangpi khat, I custom bu a um teng juichiet I sam leh! Tanu hahna, shina leh manna, dahna leh vangsietna I tuo hunchiengin Zou tawndan bu phet in vai sai thei chiet lei manpha dieh ding hi.
UZO Program policy agenna ah education, land development, social economic development, electoral leh Zogal cemetery te gentel kha in um hi. Tam program leh policy te sepkhiet leh phattuompi ahitheina dingin UZO in study team a phukhiet hingkul ding hi. Guntah a study bawllou a, a paper a I koi ap kha ding uh a jauhuai hi. UZO in study team hing siemkhie in hun bikhiet khat sunga a report a luikhiet dingin vai hing hawm thei uleh a deihuoi hi.
No comments:
Post a Comment