Khovel munchin gam chin a um Zo suon, Zo mipite, Zolengthe managing board te'n ngainatna lienpi toh Zomi Nam Ni chibai ka hing bu uhi. Tam Zo suonte dinga ni poimaw i Nam Ni in i lah uah ki itna leh lemna hing tun ta hen.
Zomi Nam Ni i chi a meaning tuam deu in let ta lei “The day our flesh, soul, heart and whole body are filled with the fragrance of Zomism” (Zomi gim nam pum a Zomi Nam Ni lawm ding) chi hileh kilawm, hi zong ahi ngai ahi. Zomi Nam Ni i chi a'ng kipatna them khat suut zuai talei;
Kum 1948, February 20 ni’n Zomi Nam Ni ana pieng hi. Tua masang in Chin Hills Regulation Act, 1896 toh Lushai Hills, Manipur gam singtang teng, tua Nagaland gam teng, tu-a Sagaing Division sunga um Sommra Hill teng leh Mizoram tawdop lam a Cacha-Chakma gamteng vai hawm in ana um hi. Chin Hills Regulation Act ahileh feudalism kichi kumpi ngeina toh ki vaihawmna chi khat ahi.
Kum 1948, Janaury 4, jingmawng nai 4.20 in Burma in suotatna ngah hi. Tua hun in Burma President masa - Sao Shwe Thaike in Falam gam vehna va nei. Tua hun in Zomi Nam buppi kikhopna ana nei pi ua Pu Thang Za Kai (Subidar) lamkai in “Kumpi ngeina bei hen, Zogam a zong mipi vaihawmna um hen” chi’a ana ngetna uh pompia in ana um hi. Tua chi’n February 20, 1948 ni pen Zomi buppi guolzawhni, Zomite suotatna ni ahiman in Zomi Nam Ni chi’n ana minvaw uhi. Lam khat ah kumpi ngeina piengsah The Chin Hills Regulation Act shini ana suo hi. Tua chi’n Chin Special Division Act ana siemkhie ua, kumpi ngeina hinawnlou in mipi thaneina toh vai ana kihawm uhi.
Gam bup nei a eima leh eima kivaihawmna - zalenna ana hisih nanleh, kumpi thaneina hinawnlou, mipi thaneina toh kivaihawmna pienni ahi man in alenna chanve chithei in um hi. Tuchiengin ahileh gam 3 ah khen nen in um ma nanlei, i na kipatna i chi diei, i na ki bulphuna uh Burma ahiman in Zomi te di'a chiemte kham ching zalenna i ngahni uh a suota hi.
No comments:
Post a Comment