Selung gelgel veng e, sun lung jan lung sielsiel tang e, luai naubang kivei tutkhawl theilou bu-al khuon dong in, jingkhuo vah ding kagel chieng laidip dap e, suunni heilam akai diei maw? chi'a a te, a khang in hai bang i ngahla uh 12th Manipur Assembly election 2022 result, tuni 10 March 2022 ni'n Manipur pumpi ah Counting Centre 12 apat hall 41 ah vote simna umta ding hi.
Manipur a district 16 sunga 60 assembly constituencies apat vote nei mi 89.3 per cent in vote a khietna, candidate mi 265 te vote muja leh a maban ding uh simkhietna leh puonjana tuni'n umta ding hi. Jing lam nai 8 in postal ballotte simna kipan ding a, 08.30AM apat in EVM tungtawn a kikhia vote simna in sun zom ding hi. Amasa in Assembly Constituency 41 te sim masat hiding a, tuate zaw chiah a kivat A/C 19 te sutzom hi ding hi. Buoina bangma a umlouna dingin vote simna munte ah sepai Central Armed Police Force (CAPF) leh Manipur Police te dan thum in kichieng ding uhi. Vote sim hun sung in district control rooms ban ah state control room te ah live a et ding in webcast bawl hi ding hi. Tukum kitelna ahileh kum dang banglou in pienken a guol phalou (PwD) mi 14,565 te'n vote khia ua 90% tungpha hi.
Manipur i chi pen Party system a peilou, mimal a ki-en nalai ahi dungjui in ate-akhang in election ki ngolpi chiet chilei ki genkhiel lawmlawm lou di'n gingtat huai hi. Result ki phuonkhiet ding ngahla lou koima umlou ihi dungjui un, a deisahpa a ching in chinglou in zong gingtu khat hina dawl a apuodan i siem uh poi maw hi. Laisiengthou sunga Ecclesiastes 3 ah "sil jousie in ama hun a nei chiet hi - Kaa hun a um a, nui hun a um hi, daa hun a um a, laam hun a um hi" achi bang in i law chin in zong, i lawsap in zong sil umthei mawng ahi chi lung a geldoh in kipah dan, da dan siem poimaw hi.
Ei lawchin lopna zieh a mite mitsipna i hi kha ding kiven poimaw a, ei lawsap zieh a zawnhan a mite suhbuoi chite zong sil zumhuai pi khat ahi chi i thei poimaw mama hi. Thugenpa 3:12 na ah 'Mihingte a dingin adamsung ua dinga kipahna leh silhoi abawl uh kaan a hoizaw bangma a um sih' chi ahiman in i dani, i kipahni a zong silhoi bawl pen ikitaiteet ding uh ahi hizaw dan hi. Thugenpa 3:2 na in 'Pien hun a um a, shi hun a um hi. Suon hun a um a, Suon sate bawdoh hun a um hi.' a chi dungjui in i tunga sil hing tengte pen Pasian in amit tunna leh i tunlouna te zieh a nna sem hizaw ahi chi lasiem in, i sep i bawl tapouma ama thupina ding a bawl chiet di'n gintute iki hanthawn ahi.
LAWCHIN DAN LEH LAWSAP DAN SIEM CHIET DING IN AW LE!
-------------------
T. Zamlunmang Zou
@ Pupu Zou
-------------------
No comments:
Post a Comment