KHO HAUSA VAIHAWMTE KUNGA LAITHOT

Tengnoupal, 2nd October, 2021

Pu Haulianlal Guite, Additional Secretary, Rural Development and Panchayati Raj Department, Government of Manipur in File No. 13/12021-RD and PR-RD&PR, dated 29th September 2021 ni'a Deputy Commissioner teng kunga 'People's Plan Campaign 2021 - Sabki Yojana Sabka Vikas' chi thupi zanga alaithot toh kisai tamlou hing kum nuam kahi.

Ministry of Rural Development, Ministry of Panchayati Raj, Government of India thupia dan ahileh kum 2021-22 sunga sepkhiet ding Gram Panchayat Development Plan (GPDP) kichi, ei hausa a kivaihawmte thei bailam dingin 'Village Development Plan' pen 2nd October 2021 apat 31st January 2022 sunga siem khiet ding chi ahi. Tam toh kisai in 2nd October 2021 ni'a Village Assembly/Gram Sabha khatveina khochin in a nei ding chi ahi. 2nd October ni'a village assembly ina saikha louta ua ahile zong akinthei lam a bawl thei veve ahi. Ha 3 hun kipia sunga meeting masa pen a genkhawm dingte lah a apoimaw diah 2te ahileh 1)  Ningkum (2020-21) sunga Mission Antyodaya toh kisai askisam, a chingla, bawl tuoh ngai chite genkhawm ding leh 2) MSRLM SHG memberte'n a bawl VPRP kichi genkhawm ding (VPRP pen a nuai langah detail in mu thei ding) chi ahi.

A taangpi a i thei dan un, Gram Sabha kichi ei singtangmi hausa a kivaihawmte a ding hilou, phaigam a Panchayati Raj dan a kivaihawmna munte a ding ahi chipen eilawi theidan tangpi ahi. Gram Sabha kichi leh Village Assembly kichi a ki bahlouna leh akibahna gen ut ka hi zaw sih a, a tup-le-ngiim pen kho sung leh innsuon chin khantouna, lemna leh muonna, khat-le-khat kituatah a tenkhawmna ding ahi gialgial hi. I khosung khantouna dinga Village Assembly bawl a, khosung mite, a zawng pen apat a haupen ngaidan lahkhawm khu ahi tami thupiah in a tup pipen khu.

Gram Panchayat Development Plan (GPDP) 

GPDP/VDP leh VPRP kichi bang china, bang a tup leh bang chi bawl ding chitoh kisai, a thei zong tampi umkha ta vei, hinanleh a theinailou i umkha ua ahileh tamlou hing kum nuom kahi, ke'n a thei pen china hituomlou ahi aw. GPDP/VDP kichi ahileh i khosung khantouna dinga apoimaw nasep-silbawl guonggalna (plan) ahi. VPRP kichi ahileh Village Poverty Reduction Plan china hi a, tami ahileh GPDP/VDP hoitah khat siemkhiet theina dinga vanzah poimaw tah khat ahi.

VPRP bang chi bawl ding:

I bawl ngeina uh ahileh GPDP i chi chia MGNREGS meimei toh ki en kop, I khosung mi nautangte'n bang poimaw asa pen vuai chi kikupna um seng lou, Hausa in ama mimal ngai a poimaw asah pen ban gellut tou ziau. Khosung nop leh khangtou kichi pen Hausa leh a vaihawmpite meimei nopsahna khu nopsahna piching hilou ahi chi theilei uthuai kasa hi. I khosung a teeng tengin i khuo mama nuom e a chitheina dingua tam bang khantouna vaiguon i guonggal chiengua a zawng pen apat a hausa pen tanpha ngaidan kaikhawm suo dimdiam in, tuana pat plan siem thei lei khopi nuom hing peing thei pan ding ahi. Tua ahiman in tuabang pientheina dinga vanzah poimaw mama khat ahileh VPRP kichi pen ahi.

Village Poverty Reduction Plan in khosung khantouna ding meimei hinawnlou in innsuon a mimal chin tanpha poimawte huompha hi. VPRP nasepna nuai a huomsah thei khen khat ahileh:

1. Entitlement Plan kichi Central leh state Govt scheme tuomtuom umte, khosung innsuon in a neitai, a nei nailou bangja um, abawl thei ding hinajenpi a bawl nailou bangja um chite theina chi khat ahi. Tam pen MGNREGS toh kizopna nei sih nanleh I khosung a tuobang poimaw teng Village Authority in Line Department te toh ki thuja a a lompi'a bawl thei sil khat ahi.
2. Livelihood Plan kichi zong huom thei ahi. Tam kihinsuona ding a nasep-silbawl pen innsuon chin in apoimaw bang chiet uh hing tahlang ding ua, tuana pat MGNREGS tungtawn apat bang bang guonlut thei, bang bang Line Department toh kithuja a bawl thei um chite bikhiet thei ahi.
3. Public Goods, Services and Resource Development Plan (PGSRDP), tam pen ahileh a tunglang a i gensa, mi khat meimei in khosung a khantouna vaiguon a guonggal sangin innsuon apat i khosung a dingin tami poimaw chi'a ahing gelte uapat a tam penpen khu MGNREGS tungtawn a bawl thei amah, ahisihleh koitoh kizop a bawl thei amah chi suidoh ding ahi. Khosung a Hausapu'n poimaw asahpen khu khosung mite'n poimaw asah pen uh ahilou meithei, a hausa khat in poimaw asah khu a zawng innsuonte'n poimaw asah loupen uh ana hikha meithei. Tua ziah a innsuon chin apat PGSRD hing piengkhete khu guolsuh diim diam a, Village Assembly chia heipen i khosung a dingin apoimaw pen ei chia Prioritize bawl poimaw hi.
4. Social Development Plan - tam zong a poimaw mamate lah a khat ahi. I khosung ah mi nautang sukha, subuai, su thathou, su kipa leh su genthei bang a um ei, bang chi etkai a hoi ding chivel innsuon apat hing kuonkhete khu khosunga dinga genkhawm khamching mama thu-le-la hing hi ding hi. Tam pen budget zong ngailou, koi line department zong ngailou, eima khosunga saithei sil ngen hitangpi ding hi.

GPDP bang chi bawl ding

Tamna a tunga i gen VPRP nasepna apat hing piengkhia teng khu hoitah a i genkhawm zaw chiangin mipi ngaidan a apoimaw diah teng khu hoitah a guol tuoh a, a khil khil a khen doh a, hei teng bang bang department toh kisai heiteng bang scheme toh kisai, innsuon bangja in bang scheme poimaw, innsuon bangja in bang chibang nasep poimaw, i khosung a dinga bang pen tah poimaw chia hoitah a ing guoltua pen khu GPDP/VDP hilel ahi.

Tam teng hoitah a ing guoltuo zaw chia BDO amah, Line Depatment tuomtuom ah submit in deljui lei bang dinga hing ki ngaisah lou ding amah?

Khaile, Kho hausa hoi leh khosung mipite khuol hausate'n tukum apat in i khuo mipite toh development plan bawl ding in pan la chiet vai le. Kol ham Gram Sabha kichi ziah a uai-ai lou ding in ikichial ua, kol ham Gram Panchayat chite ziah a lung awpkai lou dingin iki ngen uh ahi.

Lungdam ing.

Thei kham kham, mawl thitthet a lunggel hing kum

T. Zamlunmang Zou @ Pupu Zou

Kerith Village, CCpur.