BAILAM TAH A KIPESAWN THEI COVID-19 LOCKDOWN BEI CHIAH

I state sung vua COVID-19 natna vei mi nite thoidam zatoute, tami natna apat kivenna ding a panla leh lummaw toumaw jen a dan-le-thupia bawl a enkai state solkal ban ah, dan-le-thupiate hoitah a jui leh mahni innsung a ki khum chimit mipite ziehin I state Manipur pumpi khu Green Zone a phuon a umta ahiman in zatoute hi in, solkal hi in mipite hitaleh I pankhawmna zieh vua COVID-19 natna hit apat tu tadi a ki vengbit jou ihiman un, patatna sangpen pieh ihita uhi.

Coronavirus zieh a lockdown hing bei taleh nidang bang in mipi phelum pul hing bang kia ta ding, tuaban ah state dangte toh kikawm tuona hon a a’ng um leh mituomtuom hing lenglut ding, gam pam a um imi isate zong hing dieng lutding ahiman in, mi khat pou in thei ding a poimaw tamlou ban ah I jui chiet teitei ding uh tamte ahi.

1. Coronavirus ahileh khat-le-khat ki suhkha tungtawn a ki lawsawn thei natna hit ahiman in, social distancing khu hun tomkhat sung I bawl zing nalai uh hing poimaw ding hi.
2. Mipi umna leh mi khat poupou toh kimaituana I nei chieng ua maituom/mask I zah teitei uh poimaw ding a, Covid-19 apat kivenna bep hitalou in, I gam guozuh zieh in leivui zong nasatah a hing tam ding ahiman in mahni tahsa damtheina ding a zong poimawte lah a khat ahi.
3. I inn vuapat I pawtkhiet, bazaar lah vel I pha ahiai, mun khat poupou I pawt chiengin inn I tun chieh I khut a loutheilou in sawp dieng teitei lei tuami zong kivenna hoi mama khat hing hi ding hi.
4. Adieh in mi upa leh tesete ahileh ahithei tan in pawt tam naida phot nalai lei ahoi ding, azieh a hileh I damtheina uh khanglaite sanga hatmaw zaw leh tami natna pen bailam tah a matthei ahiban ah, doula dieh uh chi ahiman in.
5. Michin in thei ding a poimaw mama khat ahileh midang toh I umkhawm chieng un ikhu ahisihleh hatthi chiengin i kam tuom thei lei ahoi ding hi, i kam tuomna ding inei zuai lou ulezong i khut toh i kam tuom teitei ding ahi.
6. A tawpna ding ah, COVID-19 natna kilatnate nei a iki thei a, midang zong tuabang chiemtenate nei a I thei leh akinlam a helpline number kipete ahileh leh eima damdawi inn a akin lam a ki etsah ding ahi.

- Pupu Zou