May 3, 2020 nita, keima tang a innsung a tou, Zolengthe facebook leh whatsapp group a thu ki post leh commentte ka simsim leh UZO, ZYO leh ZSP thu ma dim ahi chia ka lungsim a sil khat hing kilang tiamtuom hive aw! High school kailai apat ZSP a ana ki involved den, tom khat jou a ZYO lah vel a hing ki haltou kia, hinanleh UZO level tan a kihal ding leh UZO vai a kipei ding chite ka ngaisutna zong ana umkhalou hinajenpi, bang chidan a panmun lientah tukha zong hilou, kum tamlou peisa apat UZO vai a ana ki halkha kamah chi ngaisutna hing kilang kawi laizang!
Umna zil chilei lah, kum 20 lam phiel ka hun tam zaw Manipur pulang a ka zah bei, a bang zieh pen tah mawng adiei? Tulai khovel etdan a et in UZO lamkaite lah ka innsungmi, ka be-le-phung chilei lah tua chia ki laigui zopna tahtah um lah hisamlou, family timeline enlei lah ka innsung mite UZO a kibuol um senglou. Bang zieh pentah a UZO vai a ana kisala kha kamah chi’a ka ki ngaisut lai in a zieh hi a ka ngaisut khiette nangma mimal ki involve khahna ziehte toh akibang ei ana en mawng vawile..!
Tuate I gen masangin, UZO President Pu Chinlunthang ka mu dan tamlou hing gen zuai vang e. Naupang chilou a ngaidan I kupte hing lunglutpi leh naupang nou experience neilou chi vate lou a I ngaidan hing dong thei UZO President Pu Chinlunthang toh kipawl a nopna khat um kasa vanglah hi. MLA a kai leh kailou pen thutuom, a kai ding zong deisah huai, hinanleh ka kipahna mama khat ahileh ama kam teng ngeingei a ka jahna a gen “kei MLA kai ding leh kailou ding buoipi lou in I nampi a dingin bang bang I bawlkhawm thei vuai chi buoipi zaw vai” a chi pen in MLA kai khel khel pen a tup lianpen ana hi khollou ahiban ah, Zou nampi a dinga asset a tam theitawp sepkhiet ding chi a lunglutna khat ana hi dan muthei in um hi. A thugen dang khat. “hunpha I nei a MLA bang I kai zaw leh koi a kai nuomlou a um diai, tua dinmun I tung thei leh I nam a ding a tam sem sepkhiet nalai ding chi pen ka ngaisutna ahi” achi in kithuopi thanopna lien sah deudeu hi. 1960s lai apat UZO in politics ana sai den ahina ah, tuni chienga UZO platform zang a Singngat Politics kisai pen akoi akoi in advantage lachiet dingin gingta lel ing. UZO President ka theikha teng lah a Programs and Policies nei a na sem um sun, nampi kuong tawlna toh kisai a mimal a neijou khat ahiei, MLA leh MDC khat leh ni muonna leh lam-etna liuliau toh nasem lou, mipi thahatna muong a nasem um sun ahi zieh in kithuopi nop vg lah ahi.
Ka lunglutna diehte:
1. Programs and Policies: 23rd May, 1954 ni’a Jou National Council (JNC, tu a UZO) kiphu ni apat ajatathuai lamkai masate'n ana sepkhiette uh I sim suhsuh leh kum taza sunga tami/tuami sepkhiet ding chi’a target/mission ana nei uh gen ding um zeuhzeuh nanleh tuachi lawmlawm a chiemte kham ding ban ah nampi a dinga asset nei den ding tuachi tamlou hi. Hinanleh kum 10 vel peisa, kum 2009 vel apat in UZO in Programs and Policies chi’n Nampi a dinga lam tuomtuom a khantouna leh gou um den thei ding tup-le-ngiim kum tengin hing neitou den ahiman un, tuami Programs and Policies tengin theilou kal in UZO vai a ki buolna hing tun thupi pen in ka mu hi.
Ka ngaisut leh ka lunglutna khu koi MLA kai leh koi thuneina toh kisai sangin, Zou nampi a dinga nna sepkhiet a umte leh maban a sepkhiet a hing um tou nalai dingte zieh hizaw in ka kithei hi. Pu Chinlunthang khelkhel hilou, President dang khat in zong tuabang a tup-le-ngiim nei a nasepna a’ng neitou jel leh hitheina tan a kithuopi tou jel mei a um didan in ka mu.
#Kana kipahna leh ka lunglutna sepkhiet a um leh maban a sepkhiet in um thei nalai leh chia kana lunggul khen khat ahileh:
a. A History of the Zou people – Bang chilai pou a kana ngaikhaw gige leh keima kham a kana puonat mama khat, koi library, koi office ah laibu sui talei Zou toh kisai laibu mu ding um senglou, hinanleh tun ahileh iki thang-atpi leh iki letsahpi mama “A history of the Zou people” chi laibu hoitah bawlkhiet in umta, koi Singngat A/C MLA leh UZO president hisang a zong kipah huai kasahte lah a khat ahi.
b. Education Reformation - UZO Education Policy en talei, Behiang ah St. Marys’ School khu High School piching suo ahita hi. Pawl sawm (Class-X) Exam leh lawching Sangnaupang phabep pi zong um tahi. Tuaban ah sangnaupangte khuolna in i nam in pan la in kumpi/solkal in Hostel zong hing lampieh ta. Tam skul ahileh maban a tusanga ang khanlet zong ka lam en nalai. Hithei ding bawn hileh Zou Gal Memorial High School pen puotha hinalai henlen, tuaban ah UZO policy a um Muollum leh Tuining ah zong skul kipuotha teitei hen aw.
c. Hattuom leh Nampi Pangkhaw - Zou nam sung a Hattuom ZPCS, MELC, ZCBC te toh UZO in sepkhawm theite semkhawm in Laisimna lam pan lakhawm in ZSP GHQ te SSC Coaching Organise bawl in um thei hi. Hattuomte’n sponsore ziehzieh theita. Mailam hun a zong education mei hilou a literature leh a dangdang a zong kal ang suon khawm thei uh deihuai kasahi.
d. Zou Gal Memorial Shield - Kum 20 vel ana kingaisah talou Zogal Memorial Shield Tournament zong Lamka Public Ground ah CDSA toh kithuo in apeisa 23 April – 30 June 2015 sung in lawching tah leh I gam sung thawn jen a sai in hing um kia hi. A ban ah football mei hitalou, volley ball tanpha sai in hing umkia a, maban a zong tamlou a a’ng saitou uh kinep huai kasa hi.
e. Zou Gal Centenary and Cemetery – Mite’n bang gen in bang bang e khat toh mekop in dem manan uleh ken vang thupitah a Zou Gal Centenary kilawm leh khangsawn khang za in ang mu ding leh a kiletsahpi mama ding uh, Zou khangthu a um den ding Zou Gal Cemetery bawlkhiet a um toh kisai UZO lamkaite mama patathuai kasa hi. Manipur Chief Minister bang zingun a ki hankhe ul ichileh a'ng tan huai kasa mama hi. ZGC kilopna mun a hawkha, Zou mising akipahlou leh a kiletsahpi lou khat zong umlou dingin ka gingta thei sih hi.
f. Zou Gal Centenary Ground – Mi khat meimei in a tuo hilou, Zou milip in I nei dan chiet ua ki pang a kibawl, Zou Gal Centenary theizingna ding a mawltuol kibawl bang chu thupi chilou theilou ahi. Tam bang visionary UZO lamkaite patathuai kasa tungtuong!
g. Zou Custom book – Zou sung a um phung-le-taang te’n phung tawndan chi’n I Zou custom umpen nelsie pawl um nanlei, khangnoute’n nikhat ni chieng a akibang tawndan jui thei ding lam-etna toh Zou Costoms laibu English version toh bawl khiet in um.
h. Global Zou Forum - UZO India panlahna toh UZO Myanmar, UZO USA leh UZO Malaysia te’n pan lakhawm ua UZO International Forum siemkhiet na dingin pan la zing uhi. Tuaban ah UZO-USA leh UZO-Delhi panlahna in UZO pen United Nation Department ‘United Nations Economic and Social Council’ nuoi a register bawl hita hi.
i. Zou Literature Promotion - The First Indo-Myanmar International Seminar on Zou Language, Literature, Culture and Custom, sponsored by UZO (USA), organised by Zou Literature Society, India, 15-16 May 2013 ni in nei in um a, “Thupuon” khu 1st Joint Meeting of UZO India & Myanmar, 15 March 2016 in kituohtah a pom tou ahi. Zou MIL ahileh kipah huai seng seng gen tam da mei vai maw, Imphal school.khen khat a a sangsye ding umlou pen bang chi bawl a hoi amah chi hing enkai uleh deihuai.
j. Model Village Committee – Tami ahileh program um hinanleh tunitan in sepkhiet in um nailou phot. Zou milip panna leh Govt Department tuomtuom toh convergence tungtawn a bawl teitei hileh ut huai mama maw.
k. Zou Archive Committee – Tami ahileh ka ngai poimaw mama te lah a khat ahi, a mun ding ngaisut in umta nanleh tunitan in sepkhiet tahtah in um thei nailou nalai hi. ZSP leh UZO kithuo a nikhat ni chie Zou khangthu toh kisai sil kaikhawm thei teng kaikhawm a a ang um ding kinepna lienpi toh ka ngah zing khat ahi.
2. Mipite pankhawmna – Tu-le-tu a UZO lamkaite ngaisutna hoi kasahkia khat ahileh Zou sunga sil khat poupou bawl ahichia mi khat-le-ni in credit alah lou ding, mi chin pang a bawl ding chi ahi. Tuami ahi dungjui in Zou Gal Memorial Hall bang michin pang in kibawl khethei hi, A nei joute’n tam pawkhia, a neilou te’n tawm pawkhia. Tuaban ah, tutung COVID-19 lockdown zieh a ne-le-ta hamsatna toh kisai bang I et leh michin pangkhawm a Zoudawn lam a I nei khamkham a panpina kibawl thei. Zou Gal Centenary Ground bang a crore lam a bei, khat-le-ni mei panglou a michin kipang. Tam chi ding ma ahi.
Ka thuta nuam khat:
Maban a Program leh Policy a a'ng nei nalai ding ua lunggul huai kasah (lawm le guolte toh zong houlimna kana neikha jel uh) khat ahileh UZO, ZYO leh ZSP in standing capital a nei theina ding lampi a’ng khuot ding un deihuai kasahi. Pawlpi khat in sum *keng ding* aneilou pen vaihawmna nasatah a nawngkai ahiman in tami a loutheilou in hing ngaikhaw uleh uthuai.
Etsahna dingin: UZO in mun lienzaw leh kilem zaw sui in, Zou Gal Memorial Hall thupitah khat lam tha di, tua I nei uh Zou Gal Hall a office teng office dan in um den henlen, a sung awng penpung pen mi 50 tan vel tahtheina conference hall khat bawl a, adang teng NGO vel in office dan vel a a luothei ding bang in ki convert doh henlen, hateng a sum umtheina ding khat bang bawl doh in um thei leh, chipen Zou Gall Hall liendeu khat lam zaw lam chiah chidan ahi.
Gen ut tampi um nalai, sau sengta, hunsah phottai maw.
~ Pupu Zou
No comments:
Post a Comment