A party ka dei, a candidate ka guplou - A party ka deilou, a candidate ka gup

11th Manipur Legislative Assembly election 2017 vote khietna ding ni 2 meimei ki vatta, a party lah ka deithei mama sin ahinlah a candidate pen lah ka dei jell in; a candidate palah ka deisin hinanleh a party lah ka dei jel in, koipen vote pieh ding, koi party gup ding chi lungbuoi hunkhop um nalai ahi chipen social media tamtah apat muthei in um nalai hi.

Indira Gandhi, Rajiv Gandhi telawi hunlai apat Congress party support zing ei singtang mite'n Congress akichina leh vote pieh teitei ding chi ngaidan toh ana ki khangkhia chilei kikhial lawmlawm lou ding hi. Tuhun chiengin ahileh Manipur a Congress vaihawm dan a et chiengun a party dei mama nan uleh a candidate support ding mit a enthei nawnlou tampi umta hi.

Tuabang ma in, BJP i chi chiengin Hindu sakhuo a kulmut leh Christian te doudal chi in i thei phialphuol chiet uhi. Social media ah BJP candidate lah dei mama hinanleh a party ideology a et chieng ua lah Hindu kulmut ahizieh a uai-ai jel pawl um kia leuleu hi.

Tambang a a candidate pa/nu lah dei ngal, a party a et chia lah lung awpkai huai sa, a lang khat lam ah a candidate nu/pa lah dei thei mawngmawng lou, hinanleh a party pen a dei a deithaw chia buoite'n etdan tuom khat a et a i vote manpha zah siam poimaw tahi.

Etsahna dingin, Congress dei ahivang a a candidate deilou nahita a ahileh, Manipur state sunga Congress in kum 15 sung vai ahawm sungin singtangmite a dingin bang phattuomna a semkhia ua, bang chilam in khantouna a pawlut ua chi et poimaw ding in gingtat huai hi. Alangkhat lam ah, BJP deilou hinanleh a candidate dei na hikha leh tam candidate pan bang hina a nei a, bang chi'n singtang mite tanvou leh hamphatna umte a vengbit thei dia, bang tan in bawl theina a nei dia chite et poimaw ding hi.

Social Media a ngaidan kikum tam sim mama khat kia ahileh, BJP khu Christian doudal leh bawng tha ding khamtu ahi chi ahikia hi. Congress support te'n tami pansia in BJP demna nei ua, alang khat lam ah BJP support pawl khat in Manipur a Congress in kum 15 vai ahawm sungin biehin khat be kihallou in a um ei? Christian te soisah lou in a umkha ngel ei chi apan mun uh ahi.

Tambang sakhuo thu pen Congress in kum 15 vai ahawm sungin a tunglou i chi thei tuon sih a, BJP in vai hing hawmta henla hileh a tung teitei ding, a tung sih ding chi zong i chi thei sih ahi.

Khantouna nasepna lam ah enkia talei, congress support pawl, adieh in singtangmite'n gen ding nei tam mamalou uh ahi chipen muthei in um hi. Congress supporter - congress in singtanggam a dingin tami na thupi a semkhia chi muding vang mama hi. A langkhat lang ah, BJP supportte'n zong BJP nasep ding gendi nei nailou ahiman un, kum 15 sunga i phattuom pilou Congress pen henkhiet a BJP etkhiet hun mawng mawng ahita chi khu a pansan uh ahi. Tam toh kisai pen nangma vote neitu sie-le-pha theina ah kingah ding hi.