Manipur Election 2017: Manifesto a en ding moh mimal hina en ding?

11th Manipur Legislative Assembly election i nai huaihuai ta, March 4 leh 8 chiengin Manipur pumpi ah party tuomtuom candidate mi 268 apat Manipur innpi vaihawmna tou ding mi 60 telkhietna um ta ding ahina toh, bang chi'n na vote manpha na zah sawm ei? Party in na en ei? Mimal in na en ei? Ahisihleh Party manifesto in na en eimah?

Manipur a kum 15 vingveng vaihawmna ana hasuo lou Indian National Congress in a term 4na aching kia uleh abawl ding thupi pen ua agen uh Manipur gamgi kepbit ding chi ahi. Tua bangma in party dang BJP leh adangdang te'n zong tambang ma in Manipur kepbit dingthu gen neichiet uhi.

Tam territorial integrity toh kisai phaijang mite'n threat dan a mu zing khat uh ahileh Indian Constitution sunga Article 3na ana hi zing hi. A lunggul zing uh ahileh Tam Article 3na nuoi a clause khat guonbe a Manipur state sukhah sahlou ding chi ahi zing hi. Telengana state pienkhietna di'a India solkal in state solkal thukup lou a thutanna alah bang ua Naga leh Kuki te sil nget a tangtun kha ding pen shi jau a ajau zing khat uh ahi.
A lunggul dang khat kia uh ahileh Amendment of the Article 371 C of Indian Constitution ahi zing hi. Tam pen ahileh Manipur a valley leh hills chia khentu thukham khattah khat ahi ban ah, Meiteite dinga gam kelet theilouna thukhun ana um zing pen ahi. Tam India Danbupi a um thukhunte phelke na dinga dan tuomtuom Manipur solkal in ana bawl sawm zing ahi chipen michin in i thei chiet uhi.

BJP Manipur Pradesh in Vision Document 2017 a suokhietna uah govt a form zaw ua ahileh a sepkhiet dingte uh point 10 guol khe dimdiam uhi. 1. Manipur gamgi, tawndan leh a mipite humbit ding, 2. Innsuon a nasepna nei khat chiet um sam tum ding, 3. BPL te kunga Health Insurance pieh ding, 4. Innsuon a tuidawn ding pipe a luonlut sah ding, 5. Inn neiloute inn neisah ding, 6. Dist chin 4 lane road toh zop suo ding, 7. Numeite graduation tan a laisimna athawn a pieh ding, 8. Fake encounter leh corruption case suijui a, mawhna neite gawtna akituopi pieh ding, 9. Blockade free Manipur ahina dinga Highway Protection Force siemkhiet ding leh 10. Manipur khu India pumpi a dia Eco-tourism munpi a siemkhiet ding chite ahi.

Congress party in vaihawmna a tukia ua ahileh Manipur pumpi apat draconian law AFSPA paikhiet ahina dia panla ding leh Manipur gamgi constitutional safeguard ahi na di'a pan lading chi uhi. Tuaban ah law & order hoi sem hiding a, skill development tungtawn a laisiem khanglai atawm tawp a lakh 3 nasepna siemkhiet ding chi gen uhi. Kum 2022 tan in innchin ah tuineh ki ningching tunsah hiding achi ban uah kikawm tuona lampite bawltha hiding a, infrastructure facilities tuomtuom dop kang in um ding ahi ban uah, laisimna lam, NFSA zah pat hiding leh valley-hill a khantouna kibang tunsah hiding chi a manifesto uh ahi.

Tam bang ahita leh na sia-le-pha theina toh enkop inlen, na vote manpha juo mang meilou in, manphatah in zah sawm in.