Framework Agreement: BJP adi'a singbul suikha bah thei!

Congress ding a plus point hithei, BJP ding a kisui puoh theina singbul suothei. India Prime Minister Narendra Modi in "Historic Accord" ana chi hial, India solkal leh NSCN-IM te'n August 3, 2015 in kum 10 val kihouna gasuo masapen Framework Agreement thukhun ana bawl ni uapat tunitan a sung a bang thu kigial chi a thei suoi kaite chilou koima um nailou hi. NE mite adi'a bildaw huai mama khat ahing suodoh tahi. Hun ang kivei dungjui in tam FA zieh a kipahna neite'n manghil hiai hiai ua, hinanleh Nagaland daipam lamte ading in lung awpkai huai mama khat suo zing hi.

11th Manipur Legislative Assembly election hun a'ng nai deudeu leh FA thu zong hing ging kia deudeu ahiman in government form jou teitei ding a ki sabem set BJPte adingin ki suikha theina singbul hing sua ding bang in hing kilang ta hi.

All Manipur Students' Union (AMSU) in election khu chance a la in ‘Campaign for Protection of Political Identity of Manipur’ chi thupi zang in Framework Agreement sung a thu umte mipi muthei dinga luikhe dingin India phuolpi BJP government ah ngetna bawl in, Manipur ah kiphinna chituomuom election kuon mama in nei ua,  United Committee Manipur (UCM) leh Committee of Civil Societies Kangleipak (CCSK) te'n nungthuop kia uh ahiman in BJP adingin lungjin huai mama ding hi.

Prime Minister Narendra Modi leh Union Home Minister Rajnath Singh te'n Nagaland toh gamgi kitaang Arunachal Pradesh, Manipur leh Assam te sukha lou ahi chi'n tangkoupi zing nan uleh NSCN-IM General Secretary leh principal negotiator Thuingaleng Muivah in Naga sovereignty leh integration te peace talk agenda hizing ahi chi'a ana gente zieh in Nagaland kim a state dangte a dingin koipen thugen gingtat ding chi hamsa mama hi.

AMSU, UCM leh CCSK te'n election kuon laitah a FA thu nasatah a ang tangkoupi zieh un mi khenkhat a dingin tam FA pen politicised a um chi'n gen ua, khen khat inlah tami thupen politicise lou ding ahi chi jel uhi.

Bang teng hileh, political party tawsot a hing kipei ahi uleh election kichai toh a thu zong hing sip tou jel lel dingin gingtat huai a, hinanleh BJP a dingin mipi support dei laitah a tambang thu hing pieng chipen ki suikha a ki palpua na singbul sua thei sil khat a suo hi.