Manipur phaigam leh singtanggam nasatah a ki etdangna a umlai lai in Manipur University academic council thutanna dihlou ziehin a ka lou ding tantan katbe ding in kilang. Ah in ne talawvang a chileh ki law khuhkhum chipen MU academic council te'n bawlkha ua, tu in ahileh a huobu uh kilawh vapial in um uh.
Oct 8 ni'a MU Academic Council in a thutanna uh entha leh phelkhe dingin MUTSU in ni 4 sung hun pia uh, student group dang khat in Review bawllou dingin warning pekia jel uh. CM thuneina hisih nanleh ngaikhawhna toh review bawl dingin thupia a, review bawl kia ma uleh thutanna neitheilou uhi. CM an ki involve zieh in general, SC, OBC sangnaupang pawl in MU mai ah kiphinna nei ua, CM pu lim bawltawm zong haltum uhi. Tamna akiphinna uah a kim vel a um Meira Paibi te'n zong support vapia uh ahidan IFP report apat muthei in umhi. Tuabang ahita leh singtanggam a civil organisationte apat tuabang support um sihva i chi ngam di uai le?
Manipur University vaihawmte'n 2012 a ammenment pen juilou in Central Educational Institutions (Reservation in Admission) Act, 2006 dungjui a thutanna a bawl zieh ua lungkimlou etsahna a pawtsan uh ahi. 2006 Act dungjui in ST adi'n 7.5% hi a, SC - 15% leh OBC - 27 % chi ahi. Bawl tha a um 2012 Act ah ahileh ST-31%, SC-2% & OBC-17% ahi.
Tam toh kisai in MU a simlai tribal sangnaupang te'n Oct 10 ni'n MU Campus pawtsan uhi. State khat a varsity khat sangnaupang lungkimlou te'n a pawtsan chipen khangthu a di'a sil kilawmlou tah ahiban ah, ki nelsia tah a nasepna pen nasa mama ahi chi kilatna khat ahi.
Manipur University Tribal Student’s Union (MUTSU) te'n Central Educational Institutions (Reservation in Admission) Act, 2012 zah dinga a kiphinna uh, singtangmi civil society leh student body chin in moral support pieh a sietna um lawmlawm ding amah chi ut huai hi.
MU Academic Council in du-am tah a anasepna uh, ka bawl khiel ma uhi chi a ki puonngai uh ahi. UGC thupieh bang in constitutional Act, 2012 dungjui in na sempai uleh tambang buoina um lou ding leh, tua jawngha poulou a pousah uh, student pawl khat in zong review ding leh review lou ding a ana buoi lou kei ding uh ahi. A sil bawl khiel uh a man a liengkou ua akhuh uh ngai ahi.
October 13, jinglam nai 10 chiengin Singtangmi sangnaupang (ATSUM, ANSAM, KSO, MUTSU leh a dangdang)te'n Adimjati Complex, Chingmeirong apat Governor zumpi tan lampi juina nei ding ua, tuami ni chiengin bang ang pieng ei chi mipi bildaw ahi ta di.
MU Admission reservation i gen lailai in job service quota leh promotion rules toh kisai a singtangmite'n i na buoipi den uh them khat tahlang lei uthuai isa.
Service quota leh Promotion Rules:
Laigel khen khat in a gendan in Manipur pen Re-organisation of North east India Act, 1971 dungjui a kum 1971 a full fledge state hiding hinapi, tribalte'n ki vaihawmna tuom ana phut zieh in kum khat jekai a, 1972 in state piching ana mupan kichi hi. Kum 1972 in Manipur lengpa leh tribal lamkaite'n a thu in ki lemna tambang in ana nei uh kichi hi (Manipur bitna dingin nasepna umteng ah tribal mi sethum suo se khat ahi zing ding). Hinanleh tam pen tunitan in jui leh zah in um lou hi. Manipur Legislative Assembly in December 12, 1976 ni'n 'Manipur Reservation of Vacancies in Posts & Services (for SC and ST) 1976' ana pass ua, Governor in February 21, 1977 in phasahpina ana bawl nanleh a Act sunga rules a umlou ziehin zah in ana um lou. Kum 15 ving veng pei nuo in, tam Act toh kisai Commissioner of Tribal Welfare Department in December 10, 1990 ni'n Gazette No. 474 (B) dungjui in zah di'n order ana suo nanleh Chief Secretary in February 2, 1991 ni'n Gazette No. 618 dungjui in zahlou di'n order suo a, tuamai hilou in February 5, 1991 ni'n Gazette No. 639 dungjui in a thuop in order bawl khum hi. Tam thu toh kisai a hilchetna solkal in a bawlna ah 'a hi ding bang a alampi a juilou zieh a cancel ahi' ana chi hi.
Kum 15 ma peikia in, ATSUM in tanlou kei a phutzing ahiman in Manipur Legislative Assembly in September 15, 2006 ni'n a bill introduce bawl kia a, September 18, 2006 ni'n pass in umkia hi. Tam nill Assembly in a pass masang in tribal MLA 20 te thuneina "Manipur Hill Areas Committee (HAC)" kungah etkai ding, suhdih ding, ngaidam leh comment pieh dingin tungtou a, tribal MLA 20te'n a kipia bang bang, comment khat zong bawllou in ana pom hiau uhi. ATSUM in tam bill pen Governor in phasahna ana bawl leh hilou ding hi chi in governor ah Assembly a nuosawl kia dingin ngetna ana bawl ua, tua dingjui in nuothot kia in ana um hi. Tam bill khu governor in ana pomdet hitaleh tribalte'n aphattuompi malah salah ah a vangsietpi ding ana hi laizang hi. A poimaw mama, tam bill dankal a nasem a um leh a tunga action la ahiding chite um lou, SC/ST reservation percentage bang ja hi a bang chi bikhiet ding chite chieng tah a kigelna ana um lou hi. Tam bill ah PWD, IFCD, Power, PHED, V&AH, Agriculture leh department dang ah tribal employee Class II officer apat Class I officer kaisang theina, technical Section Officers (class III) apat class I a kaisang theina a umlou toh kibang in ana koi ua, Section khat ah “there will be no 'reservation' (for tribals) in appointments made on 'contract' basis” chi ana ki gial nalai uhi.
Tam hun a HAC member teng suidoh a a inn a lou uh tua khawnung haltum sah ut huai zawzen hi. Department teng en vel vel talei, employee 10,000 val umna departmentte a zong tribal employee 2500 phajou um dingin gingtat huailou hi, a zieh ahileh Tribal Welfare Department office lut kha ngeite'n na thei tham ding uhi. Tribal employee sanga general category staff tam zaw!! Tunitan in ATSUM in buoipi zing nalai hi.
No comments:
Post a Comment