Letter to the President, Zomi Youth Association, GHQ

A jataat huai President,

Zomi khanglai leh Zomi nam vai a di'a gim leh tawl khaw salou a na ki zahnate lungsim a gel pum in jataatna chibai ka hing bu hi. Zomi Youth Association leh Tribe wise philanthropic organisation te relationship mengnou khat hing kum nuom ing.

ZogamOnline.com apat news item khat "...........Songtal YPA, ZYA a kheng a om pen Dt 8/4/11 sunin ZYA HQs in Namkipna Sun dak 11:4 in namkipna nei uhi. Huaihun ah hetu tuamtuam in a uap ban uah Pastor Kawlkhum PCI(R) Songtal in Unit thak leh vaipo te a ding in thum sakna nei hi" ka sim kha ni'n ka lungsim ah sil tampi hing kilou hi.

Zomi min a ki khaikhawm teng in philanthropic orgn dang nei sese lou in min khat ah ki khawikhawm thei lei dei huai tham hi. ZYA GHQ, ZYA Block, ZYA Unit chi'n mun chin/kho chin ah um thei hitaleh ki itna leh ki ngainatna pen lien tham ching mama ding in gintaat um hi. Hi bang a i nam bing philanthropic orgn te taisan a ZYA chi'a i din khawm thei ni uh pen Zomi khangthu a chiemte kham ching hi ding hi. A zieh ahileh Zomi pen National hinawnlou in tribe hing suo thei ahiman in. Orgn tuom tuom ing ki khaikhawm chiengin national hing hi thei pan a, aki khaikhawm ding umlou pen national hi thei lou leh kilawm maw? Gam tuam tuam en talei mi tuam tuam ang ki khaikhawm chiengun national movement hing pieng thei hi. Israel ah nam 12, Indian ah sim senglou phiel, US ah tua chi boh, gam dang dang ah ki bang.

Tam banga sil hoi leh khantou vai mama ding hi a i ngaisut hinanleh aah in ne talaw vang achi dan te i bawl leh a nua chia i ki lawh khu khumna uh hing suo thei ding hi. Nam khat a ki khaikhawm i hi ta ngal ualeh, ki doh tuo diel diel a thutanna bawl tou valiai pen hun sau a di'a damna hi zaw ding hilou amah? Tuni'n YPA te'n hoi eh chi'n bawl suh thop mawh taleh i Zomi pi jaat dangte'n hoi a'ng sahpi na di uai? YPA in ZYA chi'a a min a heng vanga a dangte'n baisam tah a hing heng lou ding un ka gingta zaw hi. Khat in heng, khat in heng lou - a tawpna Zomi pen jaat (tribe) khat mai mai a hing suo thei sil um in ka mu hi.

Tua ahiman in ki thalawp tawh lei zong bawl suh thop sangin eima sungah ki kum khawm dial dial in i ki thukimna bang in pei lei Zomi min in ma sawn zaw lou ding amah? Nang na min tai, amau amin tai, ei i min tai? chi'a i ki doh thei laisie, Zomi in ma sawn zing ding hi.

Regards

T. Zamlunmang Zou

+91-9990671987

New Delhi

-----------------------------

www.zolengthe.net

www.zamlunmang.blogspot.com

www.youtube.com/zoulun

www.esnips.com/web/ZOSongsMP3