Ni 200 chingta, kum khat (ni 365) chingna ding ni 165 maimai vatta, naungeh hileh a iplahuai, a ithuoi laitah hiding. A ni phaja a et in hun sawtpi bangta nanleh tribal mite lungthahna uili chia zong kiamnailou in um. I pu i pate hunlai in mishi-ai kal khat bang anakoi jel uh, hinanleh mishiluong ni 200 kikoi kichi Zo khangthu ah kitheikha nailou a, um zong ana umkha lou dingin gingtathuai. Tribalte lungthahna pen August 31, 2015 ni'a thakhat thu a hing kipan bang nanleh, i et vengveng chiengin a kipatna pen sawtpi hita ahidan muthei in umhi.
Tribal mipi a lakh a simte thataang a kamka ding, lamkai ding, bitna ding a vaihawm ding leh thusung dinga telching a um, India Constitution Article 371C in special provision anapia HAC (tribal MLA) te'n akilepsan zieh in lungthahna a lesawm a kuongja ahidan zong muthei in um.
