Election Manifesto

Manipur Hill District tuamtuam ah Autonomous District Council Member teelna ding election huipi’n igam a zelsuoh laitah ahi a, ‘kei zong mi muonthei khat kahi’ kichi deu teng candidate in ahing kiguol suh diudeu uhi. Hun paisa a nampi ading a nasep, sum-le-pai senna muongpawl, be-le-phung muongpawl, pilna-siemna muongpawl leh a thunei zawdeu pawlpi tuomtuom toh kihou thei zieh a kimuong pawl – kimuonna gen ding neichiet in tup-le-ngiim ahing tahlang chiet sam uhi.

MDCte Tungah Kinepna Lien??

Tukum Manipur Autonomous District Council member telchinga um teng teng jatatna salaam ka hingbuh utoh kiton in na gam mipite’n na tungua kinepna lienpi nei ka hi uh chi na bil ua sontel banga na bah ua, na kawmg ua na ki gatah tinten ua, na lungtang suongpeh tunga naki gel dingun ka hing theisah malam uhi..

Mipi tampi ngaidan in a min puo maimai a MDC na bang na dingua, hinanleh Zogam Thusuo vaisaite’n na sil bawltheina uh ka mu phaban uhi. Na semthei a na hing um chiengun na gam uh hing ngilvawt sih un. A masa pen in i gam lailam a a ngiemdan in geldoh unlen, Muollum leh Behieng a kingahna kham skul na hingtun doh teitei ding uh ki lunggul tinten hi. Lamka khopi zot ngai vateh lou a i innmun a skul ingkai thei chiet chiengun i gam dinmun hing detdou dinga, i zoudawnte hing seltha kia ding ahi bou hi.Laisimna kisuuhlou ziehin i zoudawn ki taisan zing ahiman in skul hoitah poimaw masa pen hi. Zoudawn khuote i taisan chieh, i gam neu deudeu himai lou amah? Tua ahiman in zoudawn a laisimna hoi poimaw masa pen hi.