Thudu chitahma, tuni Rengkai a teng Raju muolliam, ka inn sah vua hing ki vui, va en in thu va kan.
Islam/Muslim te kivui bang achi mawng ei chi'a ka va et. Christiante kivui dan toh kikhe mama. Islam a kivuida (funeral) khu Janazah kichi ahi. Islamic dan tangpi ahileh mi a shi chia issue dang um ahilou leh naikal 24 sunga ki vui teitei di, mi shite tahsa pumpi thumvei tei a silsieng uh, a silsieng ding zong a pasal/ji ahisihleh a innsung ua a shipen numei ahileh numei in a sil di, pasal ahileh pasal in a sil di, tuazaw chia puon ngou toh tuom un hankhu a a luong koi ahimasang a thumna nei uh, tuazaw chia vui a um.
Luongdapsa silsieng dan - tahsa silsieng dan zong a din a den a um chitchet hinalai. Tahsa pumpi phal 4 a khen ding in a phalphal a sil ditdet di. A masapen a tahsa zietlam tunglam, anina ah tahsa veilam tung lam, a thumna ah tahsa zietlam nuailam leh a lina ah tahsa veilam nuailam sil ding.
Khut koidan - A khut veilam khu a awm tung a kikoi in, a zietlam khut khu a veilam khut tung a kikoi sese.
Luong tuomdan - Puon ngou sieng sitset thum tah toh kituom.
Khitah dan - Khau toh a tahsa pumpi a khut umna tung a kikhit, a keng lam a kikhit, a tahsa kimlah vel a khitah a um kia.
Hankhu tawdan - Christiante kivui dan toh kibang sim nanleh ama ua ahileh thutah a taw hilou, zahnuai/dip tan vel a thu a taw a um. Handal ahileh nidang a en i na bawl jel hankhu tawdop a shi kuong tung chet a handal kibawl ahi, hinanleh Islam tawndan in ground level ah handal bawl in um a, ground level a kibawl handal tunga lei toh vuh in um. A handal a muot chie a lei chiimsuh in a khu uh kua keukou chivel mu in um jel hi.
Shisunna toudan - Pasal teng a mai ah, numei teng a nunglam ah.
Islamic siempu Imam khu mipite mai a Mecca lam ngat a ding in thumna toh shiluong hakhietna anei.
Muslim te kivuina khu a tangpi a sip ding deng, au zezu lou.
No comments:
Post a Comment