Zou Sangnaupang Pawlpi, Moreh lamkaite tungah ka kipahna simseng lou hing tun ing. I nam sung a laibu publish lam hawmthaw huai kana sah lai in ZSP Moreh te'n Silvel Jubilee souvenir bawl ding, article khat hing giel in chi'a na'ng gen ni un kipahna in ka dim hi. ZSP Moreh in sangnaupangte huitup leh lamhil jou zing dingin masawn zingta hen. Amen!
My father used to say that it's never too late to do anything you wanted to do. And he said, 'You never know what you can accomplish until you try.' ~ Michael Jordan
Thumapui
Thupatna dingin etsahna khat en zuoi vai. Pasal khat khatvei gam avahlai in gamlah a mupi khat in abu sunga tui athah va mu a, tua atuite khat inlang ah hing puo hi. Tuana mupi tuipen inn a tun in a ahpi tuitha laitah ahiman in ahtui lah a koita hi. Tuachi'n ahtuite hing keu in ahnou leh mupi nou zong sisan laiguizom bangin hing kipawl ta liitleet uhi. Hing khanglien ua, ni khat tuana mupi nou pen in vanlam a mupi leeng dengdeng a mu tah in, aw! tuana vanthamzawl a leng dingdeng pi etlawm sam e, ei zong tuachi'n kileng thei leh chi'a a genkhiet tah in, a khanguolpi ahnoute'n tuami ahileh tungleng vate lah a thunei pen ahi. Nang tuabang a leeng thei di chi hilou na hi, tuabang ngaisutna nei in zong neikia nawnsin achi khumta uhi. Tuachi'n mupi nou zong ahina ki theilou ahiman in ahnoute mabang in leivui - tualpuong ah leisai thai in a hinkhuo mangden ta hi. Ahina kithei hitaleh ahnoute bang a leivui puong lah a ahinkhuo zangtum lou tama di hiven maw! Leeng sawm dinga leeng thei mei di hia maw! I hina kitheilou mama khu i tunna ding mun tunlouna khat ahi chi muthei in um hi.
Ki pantha in, vaingei nailou nahi
I nam sung i et veng veng chiengin laisimna lam ah hawmthaw ki huai mama mei hi. A zieh i et kia leuleu a ahileh, innsung hahsat zieh, mimal ki sumawh zieh, gam-le-nam itna zieh, tupna kichien neilou zieh, nungah-tangval kal a ki lungsiet seng zieh, i kim i pam a laisim lou tam zieh leh a dangdang zieh in laisimna tawpsan, aban sumzom lou tampi i um uhi. Nu-le-pate'n a sim ut tantan enkol jou ding hinapi, ama thasiet zieh leh kipiasiet zieh a laisim khawl san zong ki bei tuonlou hi. Tua bang dinmun a ding i um kha ua ahileh, ki pantha kia vai, ki vaigei nailou ahi chi'a chielpi hing bawl ut kahi.
A kinuapat kiate
Mi dang, nam dang apat etton thei ding tampi um, hinanleh ZSP sung a zong um simsim ta ahiman in, ZSP member, ana ki nuapat kiate ma gente in nei lei china toh, ZSP sungma a mite hing kum ding kahi.
Ka lawching hi'n IAS, IPS, IRS chite ka tung jou hi ka china vang hilou ahi. Hinanleh tami laigiel, keima ngel zong a kinuapat kiate lah a khat kahi. Tan VI (guh) ka simlai in damlouna ziehin sanginn kum 2 hial kaitheilou, a shi ding bang mei a et in kana um hi. Lawm-le-guol sanginn kailou tampite banga lou kai a, meihol hal meiding chivel bang ngaisutna kana nei ngei tham hi. Hinanleh tuate bawl ding ka hi lezong lai tan X (sawm) chiengbe tung teitei leng china toh kum 2 leh akim jou in sanginn kana kaikia hi. Tuachi'n kum hingpei jel in 2000 in graduate ka hing joukhe dup tahi. Aban sim be ding chipen ka lunggul tinten hinanleh innsung hahsat zieh in ka simjou tasih a, private school vel a sangsia nna sem pum in i nam in a tulmaw monthly magazine "Tongsann" kichi khat bawl in kum 4 hun kasa subei kia hi. Tuachi'n kitoudelna ding tupna toh Delhi a private company a kilaw dingin kana kuonkhia a, kum 6 vingveng private company a nna kasep zaw in laisimna aban ka zop ngai ahi chi'n 2010 in Master of Social Work kana simkia tahi. Tuni'n bangpi hisih nanleh Manipur solkal nuai ah sep khat nei in ka um thei sam hi. Ana ki nuapat kialou hitaleng, tu ka sepna tung ngeingei lou ding kahi chi ka nua gelkhiet thatha chiengin kipahna in ka dim hi.
Mi tam tah in zong i thei ding ua ka gingtat, Pu Suanlyan Tungnung (Kapsuanlian Tungnung) zong vaigeita, kinepna um nawnlou chi'a a dinkhawl sawm nua a hing kipantha kia khat ahiban ah, tu in ahileh Manipur solkal nuai a Department of Information and Public Relation ah sepna mu in a halaw toh a innsung enkol thei hita hi. Pu Suanlyan Tungnung zong sum-le-pai hahsatna zieh in genthei tah in a neu apat lai ana sim tou guigui khat ahi. School kaina di'a printing press a ana kilaw veve jel khat ahi. Hinanleh 2002 a graduate a zaw in aban simbe na ding a lampi kawthei mawng nawnlou ahiman in dinkhawl vawt hi. Kilaw theitheina, sep theithei sem in kikhawl vevaw a, kum 10 break a neizaw in Mumbai a TISS ah Master in Social Work hamsa tah in va simkia vevaw hi. Tam bang dinmun hamsa tah a apang geigui pen Pasian in theipi ngei ahiding, tu in a tunga i gen department ah sepna hoitah sem in um theita hi.
Khaile, tuni'n ki entha kia vai le, bang zieh a sanginn kailai ana dinkhawl na hia? Ki sim toutou lezong mite tunna tan ki tung jou sihva chi na mah? Na lawmnu-lawmpa zieh a ki thangpai suo a dinkhawl namah? Na lawm-le-guolte zong laisimlou tampi um chi'a eng a dinkhawl namah? Khamthei, ju-le-sa toh nana ki suhngol zieh a dinkhawl namah? Innsung hamsat zieh a dinkhawl namah? Bang zieh pen tah a nalaisim kimlai dinkhawl na hia? Tuni'n ki ngaisun thakia in chia chielpi hing bawl kahi.
Kum 10 lam break neinua a niteng a class va lakia ding chi na ngaisut leh sil awmlou leh zum huai ding in na ngaisun kha meithei. Ken zong ana ngaisun ngei tham kahi. Ahi'n i va kaikia hial leh high school kailai sangin nasapi'a ana nuomzaw ahidan ka mukhiet khat ahi. I classmate te toh kum 10/12/13 chivel a kikhia, ahivangin classroom i tunchieng in tuate bangma hinawnlou hi. Zumna ding bangma umlou ahi, kipantha kia vai.
I lunglutna thei ngai
Laisim kipantha kia dingte hi in, a sim tou zalzalte'n a pheng a pheng simlou in, i lunglutna bang a hia chi chieng tah a thei kilkel pum a laisim poimaw hi. Mite'n bawl tana chi'a mi bawl bawl vabawl pen lawsapna bulpi khat ahi. English in gen talei "a wrong person in the right place or a right person in the wrong place" chite ki hikha thei ahi. I lunglutlouna line a lutkha, pass tou mialmuol sam, sepna bang mu, hinanleh a sep ding bangtah a semkhe theilou chi bang umthei a, tualeh a siem a siem hinanleh i siemna zahna ding mun a lutkha lou chi vel zong umthei veve hi. Tuachi ahiman in i lunglutna bang ahia, tuami line bang um ahia chi thei chet poimaw mama hi.
Maban ding tuotna
A kipantha kia dingte leh a simzom zingte'n tam a nei a point tamlou tungtawn in eima mihing hina kithei chetna dingin kikhuolchilna neilei hoi ding in gingta ing.
1. Ka hing khuo a bang hinuom ka hia?
2. Bang zieh a tuomi hinuom ka hia?
3. Tuami in heisung hing tung ding ahia?
4. Bang hun a tuami tangthei ding ka hia?
5. Tuami tun theina di'a ko'n hing panpi ding?
6. Tua tan bang chi tun ding ka hia?
Tam a tunga eima-le-eima kidoh dinga i guolte ahileh tom nounou hinanleh, a dawnna ding pen chi tuomtuom a khenja thei nalai ahi. Na hinkhuo ah na thanuomna tampi um meithei, IAS officer na hi ut meithei, sports star na hi ut meithei, police officer na hi ut meithei, pilot, nurse, doctor, businessmen na hi ut meithei. Tua bangma in dohna dangte zong a dawnna chi tuomtuom - line tuomtuom ah khenkhiet in um thei ding hi. Tuami a chituom chiet a na khenkhiette teltah leh kichien tah a thutanna bawltheina dingin tam a nei a etsahna kipete apat thutanna bawl thei ding hi.
Mahni-Mimal Kiteena
I mimal hinkhuo, i mihing hina kichien tah teltah leh chiengtah a theitna umtheina dingin SWOT kichi, Strength (Thangahna), Weakness (basapna), Opporunities (alemtang) leh Threats (poikhoithei) apat ki et chet thei ahi.
Strength – Bang siemna lam ah tha ka ngahdeu pen ei, bang lam ah ka tungtuong ei - ham-le-pau, thugen, laigel, laisim, pilna leh a dangdang et in bang lam ah guol tungtuonna na kei ei chi ki et ngai hi.
Weakness – Nang ma mimal hinkhuo ah basapna / thangahlouna bang na nei ei? Bang pen tah khu na chauna hi in na thei ei? Tuami bang chileh siemtha thei a um ding chite ngaisut leh theikhiet poimaw ding.
Opportunities – India sung, North East sung, Manipur sung, na umna district sungah bang opportunity a um deu pen ei, na strength toh kituo, na lunglutna toh kituo sepna hi in mimal ki doutel theina ding a lemtang bang a um ei chi zong etngai tham ahi. I gam a um lou khat line a i lutkha a ahileh i nasena ding vang mama ding ahi.
Threats – Threats i chi i career toh kisai a poi khoi tham ching bang a um ei chi zong hoideu a study ngai mama ding ahi. Science lam sim hitaleng, sepna a um ei, political line a lut hitaleng political aspirant tamtah umte lah apat guol tungtuonna ding lampi a um thei na diei? Business lam a lunglut ka hi leh bang poikhoi thei a um ei chite zong laisimte'n maban a iki palpuo louna ding ua tuot ditdet ngai tham hi. Tuabang poikhoitheite apat a lampi dang (alternation plan) bang a umthei ei chi tanpha suikhet ngai mama hi.
Thukhupsitna
Academy of Finland’s research programme 'The Future of Learning, Knowledge and Skills (TULOS)' kichite'n survey a bawlna uah, sangnaupang laisimna tanlou a zom tou charcharte'n sepna mubei nan uleh a laisim sungun lunggim leh stress mama ua, hinanleh laisim ana sumzom lou ahing kipantha kiate ahileh stress um senglou leh lungmuong tah in laisim sunzom thei ua, lawching ut mama uh chi amukhiet khat uh ahi. US langa university khen khat Tufts University, University of North Carolina, Princeton University leh adangte'n sangnaupangte laisimna gap a um jeljel hoi ahichi'n class XII or graduate jou chieng a gap theitheina dingin scholarship tuomtuom pankhe theita uhi. Tuabang a gam changkangte'n zong laisimna vangkal a um hoi ahi achitheita ua ahileh, ei ang dinkhawlte'n thalahna dan a zang in kipantha kia lei hilou amah? Kipantha kia vai, vaigei nai malmal lou i hi.
Laigieltu: Tungnung Zamlunmang Zou ahileh Pupu Zou zong kichi hi. JAC ana phutkhia Phamsa Rev. Kamzakhup leh Pi Niangzadim te tapa tum ahi. Behiang ah 1977 in pienga, Daijang a khanglien in tu in ahileh Kerith khuo, Lamka ah teng hi. Ama ahileh ZOLENGTHE - Connecting the Zo people chi thupi toh internet tungtawn a Zo suonte kithujana ding ana ngaisun zing khat ahi. Zou sunga lailam khansahna ding deina zieh in monthly Magazine "Tongshann" ana pankhia hi. Ama laigel dangte na sim utleh http://zodawnfootprints.blogspot.in ah sim thei zing ding hi.
No comments:
Post a Comment