Jingkhuo hingvah dinga, sithu namjen leh minpha/minsie chinteng liengkou a baat leh a suh atung a i diengpi, mipi deitelna lamkai ding puonkhietna vaiguon hing umta ding hi. A mipi hi in a candidatete hitaleh mipi deisahna tang ding a kinem leh a ching ding a kinem ngen ihi ua, a kinem tengteng ching theilou ding leh mi khat mei telkhiet a hing um ding ahiman in telkhalou a umte hita in, telching a umte hitazong leh mipi deitelna pen i pomsiem chiet uh kipha maw mama ding hi.
Indian National Congress te'n Assam leh Kerala a lawsapna, zum-le-za nasatah a tua nua un, Tamil Nadu leh West Bengal te ah a gingtat bang ua masawn lou in kithei uhi. Tuami hun a Congress te star campaigner leh INC Vice President Rahul Gandhi in a genna ah, "mipite muonna leh gingtatna ngah ahina dingin nasa zawsem a nasepna pibawl ngai ahi" chi'n lawsapna siemtah in ana pom thei hi.
Khovel in a etton, United States of America presidential election lai a akidem dan uh, mimal hinkhuo tanpha pholkhia a kidem uh ahi, gam changkang mama hinan uleh amau bang a gam dang presidential candidate ki dem tua um lawm lawm lou hi. Result hing kipuong khia a, a lawsam tu in pomsiem tah a pom in, a lawching tu in zong siemtah in pomthei ua, saguo tanpha dawh phiel a kidem hima uleh result puon a aumni'n a lawchingtu in a lawsamtu kungah poi asahthu gen a, a lawsamtu in zong a lawchingtu kungah kipahpi thu gen thei jel veve uhi. Tam in lamkai di'a ching leh piching ahina uh ensah hi.
Chief Electoral Officer VK Dewangan in March 8 nita Lamphelpat office a mediate kungah Manipur history a dinga kitelna peaceful pen leh vote khie tamna pen kum hinalai ahi chi'n ana gen.
CEO in a peaceful pen kum chia a gen thei leh candidate leh supporterte'n zong mipi thutanna pen a hi bangbang a pomsiem pen pichin kilatna leh lungpikuo kilahna hiding ahiman in result a hing pieng bang bang i pomsiem chiet uh deihuai hi.
A lawchingte'n zong lawcihin dan siam a, mi mirsipna ding a gamtat chite bawl lou a, a lawsamte'n zong ki thangpai suolou a, a lawchingte kipahpi dan i bawl uh kitam sam hi hai!
No comments:
Post a Comment