Christmas hing nai hiei hiei, bandh thawm ging hing kipan kia ta jel! Kum bangja e khat peisa apat Awlha (December) ha sung kitatlou kei a bandh um zing toh kisai ngaidan tamlou kup nuom ka nei.
Mi chin, singtang mi, adieh in Christian te’n kum-le-kum kilutuo a I galdot zing uh, awllen ha December pen kum bangja vel peisa apat Manipur ah bandh ziehin gampam a um, nasem leh sangnaupangte’n hamsatna tampi ana tuota uhi.
Bandh umte I et leh ei a Christiante mama bawl zong tampi um a, ei gingtute’n I bawllou kal chiengun ginglou te’n a hun awng kal ah bandh ana bawl jel uhi. Christmas kuon a bandh um in gampam a umte mei mei hilou, inmun a um, summeet bawl, ne-le-ta suitawmte ban ah, singtanggam a teng I sanggamte tanpha subuoi na sa thei mama hi.
Ahi thei liei leh a koi akoi in December ha sung teng kiphinna nei nanlei nichin hindan nawngkai sah thei ding bandh leh blockade lam hizaw lou in kiphindan chi dang khat ngaisun theilei a ut huai hi. Ei a gingtute a ding a ni thupi zahna ding a ki singsahna ahileh December habul apat kipan ta ahiman in, akoi koi in lunggel det det pum in tukum apat December sung bandh leh blockade bawl nawnlou thei ham lei a ut huai hi.
December ahileh khen khat in kum khat tungtawn i sepga nieng leh tai a i nei hun ahiman in ki nei chiet sam hi. December ha sung ahileh sum zong tam, a lutna zong tam, a pawtna zong tam ahiman in bandh a um chiengin sum-le-pai luondan nasatah in kha tan a, ne-le-ta suitawmte a dingin Christmas hun sunga ki toudelna ding kholkhawm hun hi a tuahun manpha mangthang a, gampam a umte a dingin thanuom tah a inlam zot hun subuoi pha hi. Manipur sunga midang in December sung bandh a bawl sawm le zong organization, church leh pawlpi tuom tuom min in ngetna bawl nalai lei chi a dei huai hi.
Ka Bandh tuokha
Kum 2012 a ka sil tua bang koima'n tuo da lei uthuai ka sa hi. Thanuam tah a Christmas mang di'a Manipur pulang apat inlam ki zuon, vangleng i kum khiet leh bandh um, gari umlou chi thu ja masah pen a um. A jingni lah Christmas ni hita, lung thah toh, peina ding ngaisutna toh, i gei a um te khat a khet a khet suh bang ut huai zawzen. Gari umlou, na vang uh aphat leh Churachandpur lam apat police te'n gari hing sawl meithei chi hita. Airport um teng, mun tuom tuom a um teng mun khat a hing ki kai khawm, gari um ding ahileh chia ki nem tah a ki nga ngata, jan nai 12 gingta, gari um nailou.
Bei dong kisa a CCpur police SP Pu Ginboi, Singngat MLA Pu Ginsuanhau, Thanlon MLA Pu Vungzagin Valte ka ban call suh zial zial leh amauhawn zong ngaingam sam lou hi ding hiva uh, jan nai 2 leh chivel in Lamka khopi sepaite gari toh hing tailut bom bom uh, thase pum pum a inlam zot nul nul ngai. A jingni i thaw leh Christmas bei man dehtah zaih!
===========<<>>===========
No comments:
Post a Comment