2013 UZO Assembly leh Election toh kisai a houlimna thutuun

~ From the Thrid Eye View

 

United Zou Organization, GHQ President Pu John Manglianthang Zou in November 22, 2013 (Friday) ni'a Zogam Today newspaper tungtawn a theisahna abawl, UZO Danbu Bawng III, Khil 3(i), Article No. 14(2) na dungjui a Dec. 4, 2013 (Wed) ni chi'a Simveng SYO Community Hall a UZO General Assembly leh Election vaiguon um ding chi'a ahatna tungthu toh kisai, tam anei a point teng tungtawn in Zou khanglai FB zang a sanga simte'n houlimna nasatah group tuom tuom ah tan loukei in tuani apat tunitan tawp thei nailou hi.

 

Kihoulimna thulute ahileh:

1. Zou te hall, a neitu zong Zou te hinajenpi bang chidan a Zogal Memorial Hall a Zou nampi vaihawmna sangpen vaiguon nei ding lemtang lou ahiei?
2. ZRO in vaihawm khum, a thuneina utoh "Simveng SYO hall a UZO Assembly vaiguon zah ding chi'a order suo uh ahi" chi toh kisai.
3. Bang chidan a Zou nampi kivaihawmna ZRO hing ki tuochi taahla uh ahiei?
4. ZDV Thukhun

Houlimnate tungtawn a thu huoikhawm theite

 

1. Zou milip lungkimlou: Comment jousie ana sim suo sih nanleng, a ja-a ja a comment um hinanleh a tamzaw ana sim kahi man in Zomi Council nuoi a UZO Constituent member ahi pen Zou milip lungkim lou chiet ahi uh chi kilang mama hi. A tamzaw ngaidan in lamkai mahni lalna ding leh gilpi ding khuol khat leh ni zieh a sasin-salung ana neh ahi uh chi pen a ngaidan tangpi uh ahi.

 

Tam lungkimlouna bulpi ahileh kum 1997 Lamka unau melhai buoilai a mawna bei - Zou mi bangja vel khat in ahinna uh atanna tung vua, khutkhielte'n bangma thupha tawina umlou, bang chidan a kilemna umlou pi lungkim tah a vaihawmna nuoi khat a ki toukhawm thei ding chi ahi deupen hi. Lamkai te lungpi kuo in, thaulawng nuoi a gamta uh hinanleh naupang ahing khanglien leh khanglien nalai dingte lungsim ah lungkimlouna chi bang a tu a um ahidan houlimna tungtawn in ka mu hi.

2. UZO Assembly mun: UZO General Assembly cum Election mun dinga SYO Hall zah ding chi thu leh SYO Hall nei unau Simte te'n zong ahilou lam a ana ngaikha deh deh utoh kisai houlimna tungtawn a ka mu doh khen khat - Zou ten Lamka khopi a Hall ki nei sun sun leh a milip in aki letsahpi mama Zogal Memorial Hall etlawm tah um gegu a, bang chidan a SYO Hall a Zou nampi vaihawmna lienpen va nei ding ihi uai chi ahi deupen hi. Kihouna nasahtah ni 2 vel kinei zaw in ZRO in order a suo zieh a SYO hall a zah dinga thutanna um ahi chi information mukhe kia uhi.

 

Tuomi in khanglaite lungtang 'ting' chi'a sia-le-sia ki sattuo bang in ging hi. A thu a'ng sui chiengun thu lengle apat UZO GHQ sunga lamkai khen khatte policy ahi chi thujah in hing um kia hi. Mipi kihouna pen i theisa ma bangin khat in thu khat ang gen leh a dih e, dihlou chi um vate lou in ki zop tou zor zor a, a tawpna lam ah gal pieng thei ding hileh kilawm hiel hi.

3. ZDV v/s ZRO: Kihouna tungtawn a mukhiet kia khat ahileh, Zou Defence Volunteer (ZDV) lamkai khen khat in kam ana suo uh, "Zogal Hall a nei ahileh vote capture ding, a guppa uh kai sah tei tei ding" chi ahizieh a ZRO in tuabang a a um ding deilou zieh a ZDV ki involve phalouna mun ding chi'a ZYO Community Hall dinga order a suo uh ahi chi ahi kia zel hi. Tam toh kisai a khangnoute ngaidan ahileh UZO vai a ZDV aki involve leh ZRO hing ki involve pen teka theilou, Zou vai a Zou aki involve leh ngaisiem huai, hinanleh Zou nampi vai a mi dang hing ki involve chi a ngaisut chieng vua, ngaisiem thei mama lou uh ahi dan comment te apat mu thei in um hi.

4. UZO Gateway to MLA: United Zou Organisation pen nampi kuongtawlna ding sanga MLA kaina dinga misuon leh gate way to Manipur Assembly dan a koi ahizieh a tam bang teng pieng ahi chi ahikia zel hi. Tam pen ahileh a lien a mengte ngaidan leh a dih khat zong hi in ka mu hi. Kum 30 peisa apat in UZO pen MLA kaina dingin kalbi khat in ana ki zang den hi. Tam pen suh bei ahima sie UZO election pen policy tuom tuom ki gol zing ding ahi chipen genlou a maam achite uh ahi valon hi.

5. Hausa mantawm: Kihouna ki gen tam sim mama khat ahileh Zougam sunga hausate mantawm, singpi nou khat man hileltah, thudih gum nuom umlou, aki zuothei ngen tang, maipha sui, meikhu lien en, tampi pan vaihawm leh i gam sung kivaipuohna hoiva chi'a lunggel umlou, be-le-phung pei, sum them khat a ki khawng gam hausa a tam nalai zieh a UZO sunga zong party tuom tuom pieng ahi chi ahi zel hi.

 

6. UZO value kiem: Houlimna in chiengtah in a talang, UZO lamkai khenkhat ziehin UZO min ngainou, ni dang a ngaisang ahina level apat in kiem deu in kilang hi. Khanglaite lungtang ah UZO pen nampi hoina dinga ki khaikhawmna hinawnlou in mimal hamphatna ding mei a zah - khutlai khat a koi in um hi.

 

7. UZO tunga ZDV Thukhun: A ngaisut tham ching khat - Zou Defence Volunteer in UZO election leh assembly tungthu a thupuon a ana bawl, UZO lamkai namdet a um, mipi deitelna toh lamkai hiloute pen Zou nampi lamkai a pom hitheilou ding achi pen tungtang khu tu-le-tu in mipite bildaw ahi ta hi. Lamkai thate lah a min uh umta, amahaw'n ZDV thutawp palsan in nna ahing sem na ding vuai, ahisihleh nasemlou in a term sunguh dufuct lah hilou, na lah semlou in a'ng um ding vuai chipen mipi buaina ahi ta hi. Nang mimal ngaisutna ah bang chi'n pan kilaleh tam thu suh maam thei in a um ta diei le?

Thuzawna: Bang teng hitaleh, a tunga point teng adihna leh a dihlouna um tham kha na va. Lamkai di'a guon a i umta ngal a ahileh bang e ka bawl thei, bang e ka vaihawm sunga ka nam in a phattuom pi ding chi ngaisut theina pen guolzawna ahi chi thei lei uthuai ka sa hi. Lamkai minpuo buong samta ihi ngal buong leh - hei mun suh maam a poimaw ei? Hei sung vum dim a ngai ei, hei sung meet maam a ngai ei chi en masa lei damna ahi ding hi. Lamkai i chi pen gensiet, genphat pen i tuo ding mawng ahi, a gense te zong bang hituom lou, ang genpha te zong bang hituom lou ahiman in, ei zong bang kihi tuom diehlou ahi chiengin, bang hituom lou chiet chiet pasal, kapa tapa bang ding a mi gensiet vel pou a kihasiet suo leh ki thasiet suo ding? i bawl thei thei bawl tentun lei, i value mite'n ang theichien hun hing um tham ding hi.