Assembly Session: Vaihawmna humbitna di tupna?

 Zogam Today, Editorial | 29.08.2023

Manipur khangthu a di'n tuni (Aug 29, 2023) ni'n Manipur Innpi Vaihawmna hun tom penpen nei in um hi. Thudoh theina hun hon hilou, private member resolution nelsia in um, Kuki-Zo ban ah COCOMIte'n zong tami Assembly vaihawmna vaiguon toh kisai lungkimlou thu gentuoh uh.

Manipur a nam nite kal a tuolgal kipat apat tutung apen Assembly vaihawmna masapen ahiman in gen ding leh bawl ding tampi um ahi chi'n Congress lamkai Opposition Party te'n ni 5 sung tei be ahi ding ahi chi'n phutna nei uhi.  COCOMI in zong ni khat sunga vaihawmna in etsah nei lou ahi chi'n solkal mawpai ua, Kuki - Zo MLA 10te zong shina phaijang chi'a a min vaw uh Imphal khopi a luphal a lut lou ding chi'n koima tellou uhi.

Bang ziah a vaihawmna humbitna ding tupna ichi ahiai? Manipur Assembly Session nukhia pen February 21 to March 3 tan nei in ana um hi. India Danbupi Article 174 dungjui in State Assembly khat in ha 6 tan chieng a Session /vaihawmna a nei jel ding ahi chi ahiman in September 2 tan a Innpi vaihawmna bawl ahisihleh ha 6 ching/val ta ding a, a valta a ahileh solkal hing nawnlou tawbang a koi theina dingmun a ding ta ding ahiman a Vaihawmna humbitna ding tupna meimei toh Assembly Session hat a um ichi louthei sih uhi. Article 174 in session khat apat khat kikal ha 6 a val lou ding ahi chimananleh session chia ni taza tou ding ahi chi khalou jel hi.

Gam khat vaihawmna a poimaw penpen ahileh Thudoh leh Dawnbutna khu ahi. Tutung session ah thudohna ding hun zong pia hilou, ngaidan luikhietna hun ding zong pia hilou a, buaina ziah a phamsate suunna bawl in um a, chi-le-nam khentuomna umlou a muonna kepching ding leh lemna-le-muonna umna ding a kihouna umtheina di'a panlah ding leh thagum suona tawpsan dingin thutanna bawl uhi. 

Kuki-Zo MLA teng a pang lou ding theisa, Opposition party teng a lungkim lou ding theisa, Meitei Civil Society te apat nasatah a demna a um ding theisa hinazenpi a min meimei leh vaihawmna toupha luotheina dinga State Assembly Session hat a um in gen-el-sah tampi nei hi. Biren lamkaina BJP Solkal pen Double Engine achichi uh, a engine khat Delhi apat kipei pen ziah a tai luongluong nalai ahidan kilang hi. Double engine - Manipur a pen akise dildel, a mipite'n zong a tawsot nuom nawnlou leh gingtatna khat zong anei nawnlou, hinanleh Kuki-Zo namte nuoi chimitna ding vaiguon tungtawn a Meitei mipite deisahna tang hamham nalai ahidan kilang hi. Tam bang lawmlawm a minsia leh mipi deina umnawnlou a vaihawmna toupha a tousawm vevaw nalai Chief Minister khat vaihawmna huai a umkha i hi man un vangsiet huai mama hi.

COCOMI ZUAU GEN MUDOH IN UM

 Zogam Today, Editorial | 29.08.2023

Nisim August 25, 2023 ni jinglam nai 10.30 in Union Home Minister Shri Amit Shah in a official tenna mun ah Coordinating Committee on Manipur Integrity (COCOMI) memberte kihoulim ana kihoulimpi hi.  Somorendro Thokchom, Media Coordinator, COCOMI in COCOMI min a Press Communique (Ref. No.: 02/COCOMI/PR/2023) nisim 25 August 2023 nia asuokhiet mu masat ah ahoulimna uh thulute luidohna nei ua, tuana point poimaw tahtah 6 talang uhi. Point khatna ah Security Measures - gampam apat hing lutte hoitah a etkai hiding ahidan HM Amit Shah in gen chi ua, 2na ah Border Fencing - gamgi zul a dai hoitah bawl ding thu hi a, a 3na ah Manipur a separate administration siem khiat hilou ding, 4na ah Home Minister in lemna-le-muonna umna di'a ngetna bawl leh COCOMI te kunga mipi teng theisah sawn dia ngetna um, 5na ah National Highways - hun tomnou sunga NH te a buoina umlouna dia sepai khautah koi hi ding chileh 6na ah lemna leh muonna umna di'a Kuki lamkaite toh kihouna patsawm dinga COCOMI te hanthot a um ahidan uh talang uhi.

Hinanleh tuani mama, Ref. No leh Date ban ah a suotu min kibang mama ah a copy dang khat mukia hi a, tuanah Point 3 na a a gel uh, "Manipur a bang dan nuai ninanleh kivaihawmna tuom siem khiat hilou ding" (There will be no allowance for separate administrations in Manipur) chi a HM Amit Shah kamsuo dan a a suo pen uh "Bang tobang dan nuai hinanleh Manipur a kivaihawmna tuom a um lou teitei na ding in COCOMI in hatah in panla" (COCOMI strongly pursued that there will be no allowance for separate administrations in Manipur) chi'n heng kia uhi. Tami toh kisai in India Home Minister tanpha a genlou hinajenpi a gendan a lungsim neitah a athusuo uh hen a umkia in gen-le-sah tampi nei hi. Lungsim neitah mei a athusuo uh a henkia na un Union Government apat gen-le-sah um ahi chi gingtat huai hi. Kuki-Zo te'n tami Press Communique imuni ua pat lungkia kisa leh thabang kisa tah in nasatah a lungkia bang in i na um mawh uhi.

High government official a dingin thugel kichi khu pilvang huai mamate lah a khat ahi, thuteng khat genkhel ziah a gam pumpi kiling thei ahiman in COCOMI thusuo zong guntah a enloute a dingin bangma hilou meithei hi. Hinanleh thuteng ki heng chitchiet in a etsah ahileh Union Home Minister apat pilvang tah a laiteng hensah kia hi dingin gingtat huai hi.

A langkhat lang ah, Point 6na COCOMIte Kuki lamkaite toh kihouna patsawm dinga hanthawnna bawl ahi dungjui in COCMIte'n zong Meitei pipite toh kithuja a tua zaw chia sil umdan dungjui a Kuki lamkaite toh kihouna neitheina ding lampi khuot sawm ahidan uh Khuarijam Athouba, COCOMI member in The Hindu toh akihouna uah gen hi. Athouba in agenna ah, buoi apat in Kuki Civil Organisation tuomtuom hing piengkhia a, hinanleh Myanmar apat hing lutte toh kihoulou ding ahidan gen hi. Tam banga COCOMI in pan ahingla chia koite hing masot masapen ding chi i thei sih, hinanleh akoi akoi hita zong leh pilvang tah leh mipi husa ngaikawm a kalsuon ding in pawlpi tuomtuom umte iki bilsi masa ahi.

Separate Administration Demand Drivers

Zogam Today, Editorial | 27.08.2023

Manipur a Kuki-Zo suonte tunga Meitei nampi'n gal a bawlna Ni 115 (Ha 3 kal 3 leh ni 2) chinni'n i gial uh hing dawn panpante ngaisutna hing suna thei tampi leh muthei in umta ahiman in poi isa mama hi. Meitei ahileh Manipur gamgi humbitna panlah khawm ding achi uleh akisia akibal laite dong keng khat a ding khawm thei uh, khat pandan dihlou leh hoilou asahte nasan uh a chillum utoh tamchival in pangkhawm thei jel uhi.

Big Brother chia i minvaw uh Mizoram zofate hing panpina leh tawsotna nasatah a apei jel lai in, gingtatlou lam daih ah Mizo Indegenous Rights Defender (MIRD), Patriotic Revorutionary Movement (PRM), Rainbow Mizo Channel (RMC), Alpha Mizo Production (AMP) leh Elite Studio Production (ESP) te apat in thusuo hing um mawh hi. A thusuo ua agenna vuah, "Manipur a Zo suan te’n Meitei te zieh a hamsatna a tuoh uh poi kisa in buai tung apat theitawp in pan kila hi. Unaupite thuohna kou thuohna ahi a, nam bing tuomtuom in na thuohna uh kou thuohna bang a ngai in lungsim na mama hi. Tua sang a pantheina sangzaw nei ut huai in theitawp kisuozom tou zel lai ding uhi". Chi-le-nam bing kihuaina leh lungsim neu tah mai a vaihawmna bawllou ding leh pangkhawm dingin chielna hing bawl uhi. 

Sil khat poupou a sung apat i et sangin a pulang apat i et leh kimu chien thei a, a hina tah ki kheukhe thei pawl zong um hi. Tua mabang in unao Mizo te'n zong a'ng ngaikhawh seng man un agal apat hingna vialvial uh ahiman in i hina tahtah uh muchieng mama ta uh china ahi. 

Manipur a Nam lian mama Meiteite toh kidou ihi phot mei ua, bang teng gen lei zong laphuotu in "kei bei a nang hing jou lou ding, nang bei a kei zong hing jou deh lou ding" achi mabang in nang chouh ahisihleh kei chouh a douzaw guol hilou ahi uh chi i theisa ahi. Tua ahiman in pankhawm lou ngal a lampi dang umlou ahita phot hi.

Separate Administration ichi tuni leh jing a hing kipe pei di bang mai in agaa kitu bang mei in i umdoh ta ua, poi khop mei chilou gendi vang mama hi. Hun peisa a iki theisiemlouna umte tamchival hun hitalou amah?  Adiah in, tuhun ah chi-le-nam teng kikhai khawmna Indegenous Tribal Leaders' Forum (ITLF) ma pibawl in phung vua chiet lei i nalawh uh peehpen lou ding amah? Kuki, Zomi, Hmar, Chin chi'a iki lungsim bawl bawl ua, koi a hei khat a'ng enkhe dia ang kuon lelah mun tuomtuom , pindan tuomtuom a kimupi teitei sawm, tuami in ikituolouna uh tahlang leh mit a hing mute adi'a tamhaw pen kituolou uh ahi chi baisam tah a muthei hi zing ahichi lungsim a geldoh a nei ngeilou i ding uai? Home Minister hileh akoi akoi kimupi ding in kuon talei lah pawl min tuomtuom a kuon jel, i sil nget uh guntah a kihoupi ding chi'n ikimupi pa/nu un lunggel ana neitaleh 4/5 vei kihouna ang neipi dendon ding adiai?

Tua ahiman in lamkai lungpi kuote'n i maban ding uh ngaitua veng veng in ITLF ma tuhun a dingin pibawl in, buaina toh kisai a thukupna ding leh kihouna ding a um chiengin pawl tampi hilou in amau ma makai sah in, political talks ahi chiengin SoO group a umte ma in ima uh phu vevaw zaw uleh imailam vang zaw lou ding amah?

Tuachia i min uh i dawsah nuom vevaw ua ahileh ITLF leh SoO te'n India phuolpi a sil a nget leh phut chieng un Zomi Council min, Kuki Inpi min, Hmar Inpui min leh a dang dang min in support thu puong khum jel lei a thawm ngaizaw lou ding amah?

Separate Administration demand i bawlna uah Driver tam sengin zang tah a i tai theilou kha ding uh lung himaw huai ban ah gari taina ding direction koi driver pen dunga thuja ding chi mite buai ding uhi.

Kihou zing, Kihou khalou, Thuchien Khuol Zingvai

Zogam Today, Editorial | 26.08.2023

August 25, 2023 ni'a Hindustan Times a kisuo Union Home Minister toh kimu dinga Delhi tuolpi a kikul Manipur Chief Minister N. Biren Singh in Kuki-Zo MLA 10te toh kithuja zing ahidan tangkoupi hi. A genna ah, MLAte kunga vengbitna khau tah peding leh bitna leh muonna umna dia nasem khawm ding chi'a kithujapi hidan in ki gen hi. Tuaban ah Imphal a civil society organisation te kunga zong nasem ding a hing kuon MLAte suhbuoi lou ding chia kihoupi ahidan talang hi.

Tuani mama in Kuki-Zo MLA 10 te'n Joint Press Clarification bawl in Chief Minister Biren Singh in juau pumlum gen ahidan talang uhi. Siansuona abawlna ua agendan un Kuki-Zomi-Hmar MLA 10 te'n May 3 ni buaina kipat ni'a pat CM N Biren Singh toh ki houkha kilkel lou ahidan uh gen uhi. May 4 ni'a a seppi uh Pu Vungzagin Valte MLA leh Adviser to CM Biren Singh tua bang bang tuakha kia ding jau huai leh Imphal valley khu Kuki-Zomi-Hmar mipite dinga Sihna Khuuhpi (Valley of Death) suata ahiban ah, duty a um Paramilitary personalte nasan Meira Paibite'n a identity card uh etchilna nei ahiman un Imphal khopi sunga lamliante Kuki-Zomi-Hmar mipite a dinga bitna um nawnlou ahidan talang uhi. Tambang hun a CM N Biren toh kihou zong kihou sawm lou phot ahidan uh tahlang ua, tam bang a N. Biren gamtat dan pen Kuki-Zomi-Hmar mite sunga ki ginglelna leh kithutuo louna chi thelut sawm hiding ahi chi uhi.

May 12, 2023 ni'n MLA 10 te'n mipite deina banga Kuki-Zo namte Manipur apat kivaihawmna tuom (seperate administration) peding in India Prime Minister Narendra Modi kungah ah lai ana seplut uhi. Tuaban ah August 16, 2023 ni'n Churachandpur, Kangpokpi, Chandel, Tengnoupal leh Pherzawl District enkaitu di'a Chief Secretary leh DGP ahisihleh a ki kimpi Police Officer rank tuom koi dingin India PM kungah ana phutkia uhi. 

India danbupi nuai a kivaihawmna tuom bawlsah dinga ngen leh amipite uh deina banga kalsuon MLA 10te i et vengveng leh tambang hun dengdel laitah a agu agal a N.Biren Singh toh ana ki gullu lawmlawm ding un gingtat huai senglou hi. Hinanleh khovel ichipen gingtatlouna ah sapi a kuol chi zong umthei jel ahiman in genhamsapi khat ahi.

Alangkhat ah enkia talei, tulaitah ahileh N. Biren Singh khu Kuki-Zo mipite dinga galpantu leh tha chimit sawm a lamkaipa chi'a koi a umpa ahiban ah, Biren Singh lamkaina nuai a lemna thu hi in, bangthu hitaleh genna umlou ding chia pang akihi man in N. Biren dinga zong minsietna tawpkhawh hitham ahiman in MLAte tunga bang ahiai khat tungsah sawm tinten zong hikha meithei hi. A ut a thei teng gen a MLAte tenna leh giahna innlumte mipite nawkhum sah ding chi ngaisutna nei a a ut tengpi gen a khuong khuong ahimel zong koi in i thei?

Tam bang dinmun dengdel tah a ding ihiman un, mipite hi in MLAte hitananleh pilvangtah a gamtat poimaw a, thu kigen chinteng a dihna khuolchil masalou pi a phongphong sa gamtang lou dingin iki chiel ahi.

Manipur Tualgal: Ko'n khut ha masa?

Zogam Today, Editorial | 24.08.2023

Meitei leh Zo-Kuki kal ah May 3, 2023 nitahlang in tualgal ana kipan hi. Tunitan in mi 200 nai phiel dingte hinna lahpia hita a, mi 400 vel kisukha a, inn leh biahna mun tampi halsiet ahiban ah, mi nautang 50,000 valte in-le-lou lumte bel ngam lou leh bel ding neilou in mun tuomtuom ah ki thethang ta hi. 

Metei Tribe Union te'n Meitei mite Scheduled Tribe a khum lutding a phutna uh Manipur High Court a writ petition a selut uh tungtawn in 14 April 2023 ni'n Manipur High Court in state solkal tunga Central Government kunga recommend [WP(C) No. 229 of 2023] bawl di'n order ana suokhum hi.  Tam court order deilouna ziah in ATSUM lamkai in May 3 ni'n Manipur singtanggam teng ah Solidarity Peace Rally (SPR) nei in ana um hi. Tam SPR ah mi sang a siing in kihal nanleh buoina bawl koima um lou in kikhen chiet uhi. A zathada huai mama khat ahileh tampi rally um ding ahi chia thu a um apat in phaijanga Meitei pawl tuomtuom in counter blockade ana pan ua, hindan ngaina subuai in bouruak sangsah mama hi. HInanleh Churachandpur district huom sunga Anglo-Kuki War Centenary Gate hal a a um zieh in, hun sawtpi apat a sou letlet sa um zing pen buoina tahtah pen hing kipan ahi chi i thei chiet uhi. Tam buoina mun apat koi in khut ha masa a koi in inn hal pan masa chipen maban a khangthu a hing um ding ahiman in akisaipi thuneitute'n documentation hoitah a bawl hing poimaw kha ding hi. Video leh lai kigial tampi ban ah mit a mute gendan apat imu dan in tam gate pen Meitei migilou Bolero ngou a tai khenkhat in tupmawng a ana hal uh ahidan akichian mama hi. Tam mun a thuchieng suina ziehin kiselna them khat um nanleh buaina pitah piang lou a, hinanleh lampi jui khen khat inn zuon a akile lai un Meitei migilou pawl in lampi ah Pastor Sehkhohao Kipgen ana vawlum ua, tuachi'n Kangvai ah inn hal hing pan uhi. 

Nisim 20th August 2023 ni'a Meitei lamte complain bawlna kimu khat (Diary No. 176/IN/2023) Dated 20 August 2023), ah 'Displaced victims of riot', Churachandpur chia ki minvaw, a address dan ua kigial 18 Meitei villages from Churachandpur kichi te'n a genna , complaint details point 15 na ah, May 3, 2023 nitahlang nai 3.20pm vel in Kuki galvan tawite leh mi bangja ahei puonah vom silte toh Kumbi constituency a Waikhurok kholam manaw in hing pei ua, tua khuo ah inn 33 vel meimei um ahiman in Meitei inn tamna mun Torbung ziar masa ding chi kihou ua, tuachi'n Teddim Road jui in Torbung Bangla lam zuon in kijui uh chi'n kigial hi.  Tambang a Kukite galvan hoi tahtah toh kizawt amu bep un Waikhurok mipite jau in a innte uh kil ua loulai lah a kithethan uh chin genbe nalai hi. Kuki galvantawi te'n Torbung Banla a Meiteite inn leh vante suhsiet ua, inn hal ua, Kuki numeiten zong kisetuana ding suong nawn in pang uhi chi'n ngohna gial uhi. Kuki galvan tawite'n Torbung Sabal Leikai a Indramani inn a hal masat ziah ua buaina piang ahi chipen amau gendan ahi.

Tam bang a a gial hat papa, a gen hat papa, a theja jou papa gente a dih in dihlou hitaleh nasatah a ngaidan jehtu leh puihuaitu ahina ah, Zo-Kuki langte'n dihna leh sil umdan pen talat hing kul kha mei ding hi. Laigel lam peh FACT FINDING team kithuo a nasatah a bawl ngai ahidan kilatna ahi.