JCILPS Demand leh Singtangmite

Thumapui: Imphal khopi leh Manipur janggam tengah Inner Line Permit deina zieh a kiphinna husa thupi deu deu, nichin in bandh leh bandh lou chilou in kiphinna um zinga, sepai leh mipi kinawh tuona mu dingin um zing hi. Delhi khopi tanpha ah Manipur Students - Meitei sagnaupang pawlin lampi juina tanpha na neita uhi. Manipur solkal in bill tha pen ni 30 sunga luikhiet hi ding chi ua, hinanleh JCILPS te'n ni 15 sunga luikhe ding in phutna nei uhi. Ni 15 chinna ahileh tuni July 30 (Thursday) hita hi.

Mipi kiphinna nang joulou in Manipur Congress solkal in March 16, 2015 ni'a ana phatsah sa uh "Manipur Regulation of Visitors, Tenants and Migrant Workers (MRVT&MW) Bill, 2015" pen Special Assembly han jen in July 15 ni'n withraw bawl ua, kiphinna neite deidan toh ki zawitawn a bill tha siemkhe dingin drafting committee form hi. Tam drafting committee Chairman dingin Forest Minister Thoudam Debendra guon in um a, member dingin Ng Bijoy, N Biren leh RK Anand banah Convenor dingin Special Secretary (Home) M Yaiskul Meitei guon in um hi. Solkal thusuo in Joint Committee on Inner Line Permit System (JCILPS) apat zong member guon ding chi nanleh JCILPS in tuabang poimaw lou a, a nget uh point 5 guonlut ding leh akin theilam a solkal in bill a draft tha pen luikhe dingin phut uhi.