Tribal MLAte leh Monsoon Session

Zogam Today, Editorial

23.08.2023

Chief Minister N. Biren Singh lamkaina toh Manipur State Cabinet in Seppatni'a aphut dungjui un Manipur Governor Anusuiya Uikey August 29 ni di'n Assembly monsoon session hatna bawlta hi. A 12veina Manipur Legislative Assembly 4th session ahileh Sepkiani jinglam nai 11 am in kipan ding hi. Tu masang lam in zong Aug 21 nia session nei ding in phutna ana neita ua, hinanleh Governor in session ana hanlou hi, a ziah tangpi hi dinga gingtat ahileh Zo-Kuki MLA 10 te'n gam buaina ziah a Assembly session tel theilou ding chia thupia anei ziah uh hikha meithei hi. Tuaban ah United Naga Council in zong August habul lang in Civil Organisation nawhatna ziah a Manipur Assembly session bawl a um ding leh Manipur gamgi kepbitna ding thu kigen ding ahiman in Naga MLA 10te kungah session panglou dingin giihna ana bawl ngeita uhi.

I theisa mabang un tulaitah a Imphal khopi lailunga vaiguon nei dinga vakuon ding i ngaisut chieng in May 4 nia Pu Vungzagin kibawl dante mitha ah hing kilang hi. Bang tobang venbitna piah ding chi hinanleh vatel ngam huai dingin gingtat umlou hi. Singtangmi MLA 20 umte apat Zo-Kuki MLA 10 te'n a dinmun uh chieng kingkeng in phuonkhietna neita uhi. A ma uh telching mipite deina banga Manipur apat kivaihawmna tuom phutna lai tamveipi zong ana peta uhi. Tuaban ah Biren lamkaina BJP solkal nungthuop na pat KPA zong kijutkhia ua, party dang MLAte ahileh kijutkhe chet sih nan uleh a dinmun uh i thei chietsa uh ahi.

A langkhat lang ah UNC thupia banga Naga MLAte gamtang ding, ahisihleh gamtang lou ding chipen tumasang a PM kung tung ding Manipur Meitei MLA tampi te phutna ah Naga MLA 8 te'n a suoi uh ana pia ahiman un UNCte thupia pen lawching lawmlawm dingin gingtat huai senglou hi.

Zo-Kuki MLA assembly a telloute tungah Assembly dan-le-duun dungjui in action lahna a hiai, ahisihleh bang a hiai khat hing um taleh mipite'n i nung thuop na ding uai chivel ngaisut tham ching hi. Imphal lailung ah dienglut in MLA hina dawl in na vasem thei tasih nan uleh mipi telching ahina uh Sazuh kipuo a paw bembom a a bawl thei kham uh mipite thuona thuopi leh India phuolpi a i dei i ngai uh ava tut thei meimei uzong manpha hilou amah?

Khen khat in a MLA hina uapat aki tawp dinguh ahi chi'a ngaidan neipawl zong i um tham uh, khen khat kia leuleu inlah akitawp uleh zero hisuh ta ding uh, mipi nautang bang ta ding uh, tua MLA hina toh Delhi phuolpi a mipoimaw khat-le-ni ava kimupi ua, i tungthu a va tangkou thei uh phatuom ahi chipawl zong ki um veve hi.

Bangteng hileh tutung session hat a um ahileh thudang tampi genin um nanleh Manipur gamgi nengkhat zong suhke thei ahisih ding chi thupuahna bawl utman a kihan ahi michin gingtat ahiman in, tam session a MLAte'n a khut uh ava saulouma uh hoipen kha ding hi.