Editor dawkan tungpan Sangsiete' Ni thumop

~ Pupu Zou

Sangsiete' Ni, nithupi ni'n editor dawkan tunpa'n sangsie jousie jatatna lienpen toh ka hing nousiet hi. Dr Sarvepalli Radhakrishnan in 'sangsie ahileh I gam sunga lungsim hoipente ahi ding uh ahi' ana chi hi’.

Sangsie mawpuohna letdan theilou a sum-le-pai tupna toh sangsie hikha I hi leh a tha in ki ngaisunlei ut huai I sa. Sanginn a sangnaupang a sang a simte mittuhna. I khoheidan, ki kepdan, kam ham zah dan leh I mithah dan tanpha hing ki en kilkel himawh hi. Mi hing khat hindan, ham dan leh khoheidan toh kisai sangsie khat hinkhuo zahdan tunga nasatah a kinga ahiban ah, sangnaupang damsung hinkho zah dingdan tanpha I khut a um ana hi mawh hi.

Sangsie mawpuohna tah tah theipum a sangsie na semte adi’n ahileh a thanuom huaivawt nasepna khat ahi. Dr Radhakrishnan in sangsiete mawpuohna leh gam a di’a apanmunte uh a thei chieng zieha a pienni Sept 5 pen Teacher’s Day hihen ana chi ah. A thugenna khat ah, ‘sangsiete ahileh India gamsung adi’e belkheng toh kibang ahi uh, sangsie hoi leh a poimawhna thei I tam laisie, I gamsung khangtou ding, hindan, nundan hoi mihing kibelap ding ihi’ ana chi hi.

Sangsie in sanginn classroom sungah sangnaupang khat hindan nasatah in heng danglam thei hi. Classroom pen kitaihilna hizawlou in, sangsie leh sangnaupangte lawm bang a laizilna ahi ngai hi, hinanleh professional relationship ahi ding ahi. Sangsie gilou deu khat pen a homeworkte feltah sangnaupang khat in bawl zing kha Meithei, hinanleh a lungsim ah a thu hilte tengdenlou chi telsui mite’n gen uhi. Classroom pen participatory class ahi ngai hi.

Sangsie khat in a thugen pen dih in dih tasihleh sangnaupangte’n melchi tinten leh ka sangsiepa/nu’n a gen ahi chi ahiman in, thudihlou, gingtat thu mopkha dingpen pilvanghuoi mama hi. Sangsie khat ihi leh kisakholloupi a class lah lou him him ding ahi. Mihing khat ihiman in theitawh ta kichi lei zong kisahkholna pen nelsie lou kei ding ahi.

Sangsie ihileh I sangnaupangte mizie, a’ng kipatna uh, a background uh thei sawm ding ahi. Mi hingkhat a mizie, a background theilou pi’a siemhoisawm chipen beilam lou sil khat ahi. Mike Rose in a laibu “Lives in Boundaries” a agenna ah, sangsie pen lungsim sieng, mi nunnem leh lungpikuo ahipoimaw chi hi. Melinda Gates taleuleu in lah sangsie hoi mama khat pen Dollar atul atul, asiing asiing sanga manphazaw ahi ana chi hi.

Sangsiete’n tam a nei a role khen khat I sunte tungtawn in eima self evaluation ki bawl lei ut huai I sa.

1. Facilitator – tam role in mentor leh learning facilitator huom thei hi.

2. Role model – on the job role model I hi nai? Ahisihleh teaching role model in I pang ei?

3. Information provider – Lecturer type sangsie I hiei, ahisihleh practical teaching peipi sangsie I hi ei?

4. Resource developer – study guide producer I hi nai, resource material creator I hi zaw ei?

5. Planner – Curriculum planner I hiei ahisihleh Course organizer I hi ei?

6. Assessor – Student assessor I hi ei, curriculum evaluator I hi zaw ei?

 Tam a tunga I gente a dihpen leh a hoipen hilu Meithei, hinanleh I nasepna tohkisai a kituoh a zahdan ki sin lei chi tuni Sangsiete’ Ni in iki ngen ahi. Lungdam!