Lamka khantouna dingin lemna leh muonna

~ T. Zamlunmang Zou

Lamka - Zo khopi chikim leenna, a zawng a hau kikhenna, ham leh paukithei tuo, laigui khau khat zom, chin leh tuoi lenna khopi, ki thangsietna ngen a dimna, bang teng bawl in bang toh kituo sawm nanlei zong a guh a gaal a ki gaal et dimna gam. Bang chi’n tam lungsim gelte bei in unau ki-ittah leh kituo tah in i leng khawm thei diel diel diei?

Unau Lushei laphuo khat in “ni chin in ka hinkhuo ah deitel ding a um a, tahsa utna leh hagau utna ahi, sil hoi bawl ka tup chieng in sil hoilou ka baw kha leng, tahsa utna’ng ang zou leng hi. hoi ka sawm pouleh ka suol jel, sil hoi bawl theina ka neilou, Mangpa tellou hoi tup khubangma loumai ahi, aw Mangpa nang bou ka hoina nahi” achi pen Lamka mite jousie a di’a kiphuo in ka ngai hi. A la in agenbe jelna ah, “Mi dang lungsiet theina zong sil hoi ahi ka thei, ngainat ka sawm chiengin huatna a tam jel, Mangpa tellou ngainatna bangma lou mai ahi, aw Mangpa nang mai ngainatna tuntu nahi” achi ma bang in Pasian neilou leh lungsim a Mangpa neilou in ki ngainat tum in unau kichi vahuau nanlei, bang a hei khat ham phatna ang um chiengin iki ngainatna pen bangma lou suoh jel hi.

Lamka in bang a poimaw pen ei chi’n ki dong talei, a tam zaw in communication system, transportation, sanitation, good education, good governance leh sil tuom tuom i gen ding uh gintaat a um. Hinanleh thuuhtah a i ngaisut veng veng leh lemna leh muomna i poimaw pen uh ana hikhin khien hi. Tam lemna leh muonna a um theina ding a poimaw ahileh ki ngainatna leh ki itna lou in um theilou ding hi. Bang zatah memorandum of understanding suoi kai in, bang zatah in annkuong sawkhawm nanlei, Pasian i nei lou laisie uh ki itna tahtah leh ki ngainatna pen u nau kichi va huau nanlei um thei lou ding hi. Tua ahiman in hattuomte na sep ding tam mama hi. Pasian a kuon ki ngainatna chilou in kilemna tun theilou hi.

Nang na hattuom ah, kei ka hattuom ah, ama uh a hattuom uah chi’a Pasian apat itna simthu luonglet jen a ing kangkoupi chiengin a lampi hing um thei pan ding hi.

Lemna leh muonna ang um chieng in gen gen ngai nawnlou in Lamka pen ahileh a khangtou, a changkang, mite lunggul, gam am a umsate’n zong a ngai vanguut gam hing suo thei bep ding hi.

Siempha va ui tuni’n Lamka - I Jerusalem kulpi uh, Ei a ding a hundamna kulpi hi, na khut khat in na sem in len langkhat ah phaw tawi in. Khrista min suong in jun va ui, Lamka ei a ahi. Lamka khopi khel a khopi nop umlou i chi theikia na ding un pan la chiet din iki chiel ahi.