India leh Burma ki khenma peh peh, kum 1886 laivel in Tedim gam sungah vaihawmna kitu in Zou leh Kamhau mite ana ki tuoldel ngei uhi.
Kum 1911 apat ki publish Tedim Thu Kizakna Lai (July 1937, p.4) in Kamhau mite leh Zou hausate Tedim gam ana kituhna uh genkha hi. Tua hunlai in Kamhau-Sukte ten Tedim gam lienpi ah vai ana hawm uhi. Tuahun kum 1893 lai in Zou khuo 19 – Tuitum, Nabu, Kwunki, Tuidam, Chenglam, Mulam, Vanglai, Loibual, Savum, Yimwell, Buksau, Tunzang, Tunka, Tunvum, Hawbon, Chilpi, Beltung leh Narlzan (foreign historian te geldan) ana um hi.
Tuahun lai in Kamhau miten Zou khuo Thangkhal, Tungkua, Tawtak, Vanglai, Tualzangm Theimual, Belbi, Lailui leh Khuadai te ana luonkhum ua, ki tuol delna huoise tah ana pieng hi. Khat in jou jel, khat in lel jel chin ana um den uhi. Kamhau in Tedim khopi luota chitu ang um chiengin Zou hausate zong kitha patkia ua, Tedim khuo haltum dimdem uhi. Tua mi hun in Kamhau ahileh gamlah a kibu in anasuota hi. Thadou leh Burma miten Zou hausate ana kithuopi uhi.
Zou hausaten 2 veitah ana del mang uh thangpai kisa in Kamhau zong hing kipantha kia in Zou khuo aban ban in hing bulu tou a, Kahgen Zou khuo hausapi hingmat kha uhi. Kahgen hausapi zong ahinna kepbitna ahitheikha leh chi’n Zou hausate leh Kamhau kal a thu pawle in ana panga, Kamhau khut a Zou hausate kipekhe ding in ana thuzaw hi. Tuaphet in Kamhau in a lahjou Zou kuo 9 te ban ah a dang 18te zong Kamhau khut ah kipekhia uhi. Tuachi’n Kamhau in Zoukhuo ama khut a kipekhe nuomlou Mongken, Yualmei, bungzang eh Gamngai te giihna khautah pia in athu nuoi ah koi thei hi.
Tuachi’n kum 1870 laivel apat in Kamhau in vaihawmna hing tutouta ahiman in Siah(tax) agam sung ah hing pan hi. Tua ban ah Tedim hausa hinawnlou in Tedim Inpipa (Tedim Raja) ama leh ama ana kimin vuoh hi. Kum 1 in nitha 2 vei a thawn in agam mite a ut bang in ana zanga, tangseu, sa liang, sales tax Re.1 chite ana pan hi. Tamte tunitan in kizui nalai hi.
No comments:
Post a Comment